पोखरा–पोखरामा जारी नवौँ राष्ट्रिय खेलकुद प्रतियोगिता अन्तर्गत महिला क्रिकेटमा विभागीय टोली एपीएफ क्लबले विजयी सुरुवात गरेको छ भने बागमती प्रदेशले पहिलो हार भोगेको छ । एपीएफले बागमती प्रदेशलाई ४ विकेटले पराजित गर्दै पहिलो जित दर्ता गरेको हो । बागमती प्रदेशले दिएको ९० रनको लक्ष्य एपीएफले १९.१ ओभरमा ६ विकेट गुमाएर सहजै भेट्टायो । बागमतीले पहिलो खेलमा सुुदुरपश्चिम प्रदेशलाई ८ विकेटले हराएको थियो । त्यसअघि पोखरा रगंशालास्थित क्रिकेट मैदानमा एपीएफले टस जितेर फिल्डिङ रोजेपछि ब्याटिङ गरेको बागमती प्रदेशले निर्धारित २० ओभरमा ७ विकेटको क्षतिमा ८९ रनको योगफल तयार पारेको थियो । मंगलबार हुने दोस्रो खेलमा गण्डकी प्रदेश र सुदुरपश्चिम प्रदेश खेल्नेछन् । दुवै टोली पहिलो जितको खोजीमा मैदान उत्रनेछन् । गण्डकी प्रदेश पहिलो खेल मधेस प्रदेशसँग ४० रनले तथा सुदुरपश्चिम बागमतीसँग ८ विकेटले पराजित भएका थिएका थिए ।