काठमाडौँ— सशस्त्र प्रहरीले वीरगञ्जबाट भन्सार छलीका सामान बोकेको आशङ्कामा तीन वटा ट्रक नियन्त्रणमा लिएको छ । ना ३ ख १००९, ना ६ ख ७१ र ना ६ ख १८७८ नम्बरको ट्रक नियन्त्रणमा लिएको हो ।
सोमबार राति साढे ११ बजे बोर्डर आउटपोष्ट ड्राईपोर्ट र सिर्सियाबाट खटिएको सशस्त्र प्रहरी टोलीले वीरगञ्ज-२४ रामगढवाबाट सामान सहितका ती ट्रकहरूलाई नियन्त्रणमा लिएको थियो ।
बिलमा उल्लेख भएको भन्दा बढी कस्मेटिक, लेडिज जुत्ता, स्टेसनरी तथा ईलेक्ट्रिक सामान लोड गरिएको तीन वटा ट्रक नियन्त्रणमा लिएको सशस्त्र प्रहरी बल नेपाल १३ नं हेड क्वाटरले जनाएको छ ।
कार्यालयका सूचना अधिकारी सशस्त्र प्रहरी नायब उपरीक्षक सन्तोष कुमार बस्नेतका अनुसार बरामद भएका सामानको मूल्य २३ लाख ४८ हजार ८ सय ५८ रुपैयाँ मूल्याङ्कन गरिएको छ । भने तीन वटा ट्रकको मूल्य ९० लाख पर्ने अनुमान गरिएको छ ।
तीन वटा ट्रक सहित १ करोड १३ लाख ४८ हजार ८ सय ५८ मूल्य बराबरको सामान आवश्यक कारबाहीका लागि राजश्व अनुसन्धान कार्यालय पथलैयामा बुझाइएको उनले जानकारी दिए ।
जय माँ दुर्गा रोड क्यारियर्स बाट लोड भएको ना ३ ख १००९ नम्बरको ट्रकमा लोड भएको सामानको सामानको मूल्य १० लाख ५४ हजार ६ सय ३६, श्री दुर्गा रोड क्यारियर्सबाट लोड भएको ना ६ ख ७१ नम्बरको ट्रकमा लोड गरिएको सामानको मूल्य रु ९ लाख ३२ हजार ६ सय ८० र श्री दुर्गा रोड क्यारियर्सबाट लोड भएको ना ६ ख १८७८ नम्बरको ट्रकमा राखिएको सामानको मूल्य रु। ३ लाख ६१ हजार ५ सय ३७ रुपैयाँ कायम गरिएको सशस्त्र प्रहरीले जनाएको छ ।
प्रकाशित मिति: बिहीबार, मंसिर ८, २०७९ ०३:२०
प्रतिक्रिया दिनुहोस्
