भक्तपुर— आसन्न निर्वाचनका लागि भक्तपुरमा राजनीतिक दलभन्दा स्वतन्त्र उम्मेदवारी दर्ता गराउनेको सङ्ख्या दोब्बर रहेको छ ।
भक्तपुरका दुई वटै निर्वाचन क्षेत्रको प्रतिनिधि सभा र प्रदेशमा सभा गरी १९ वटा राजनीतिक दलका तर्फबाट उम्मेदवारी दर्ता गरिएको छ भने स्वतन्त्र रूपमा उम्मेदवारी दर्ता गराउनेको सङ्ख्या ३८ रहेको जिल्ला निर्वाचन कार्यालय भक्तपुरले जनाएको छ ।
जिल्ला निर्वाचन कार्यालय भक्तपुरका सूचना अधिकारी भीमबहादुर बिसीले नेपाली कांग्रेस, नेकपा (एमाले), नेकपा (माओवादी केन्द्र), नेपाल मजदुर किसान पार्टी लगायत राजनीतिक दलका तर्फबाट उम्मेदवारी दर्ता भएको जानकारी दिए । स्वतन्त्र रूपमा उम्मेदवारी दर्ता गराउनेहरूमा यसअघि विभिन्न राजनीतिक पार्टीमा आबद्ध भएका र नागरिक समाजमा लागेका व्यक्ति छन् ।
क्षेत्र नं १ को प्रतिनिधि सभा सदस्यका लागि चार जना स्वतन्त्रसहित १४ जनाले उम्मेदवारी दर्ता गराएको निर्वाचन कार्यालयका सूचना अधिकारी बिसीले बताए । यस्तै क्षेत्र नं २ को प्रतिनिधि सभा सदस्यका लागि २६ जनाले उम्मेदवारको मनोनयन दर्ता गराएका छन् । तीमध्ये ११ स्वतन्त्र छन् भने बाँकी विभिन्न दलका छन् ।
भक्तपुर निर्वाचन क्षेत्र नम्बर १ मा एक लाख २५ हजार २८ जना मतदाता छन् भने क्षेत्र नम्बर २ मा एक लाख ९४ हजार ४३९ गरी जिल्लामा कुल मतदाताको सङ्ख्या दुई लाख ९६ हजार ९७६ जना रहेको कार्यालयले जनाएको छ । जिल्लामा २२२ वटा मतदान केन्द्र छन् ।
