कास्की— नवौं राष्ट्रिय खेलकुद प्रतियोगिता अन्तर्गत फेन्सिङमा बागमती प्रदेशले थप एक स्वर्ण पदक जितेको छ । फेन्सिङको पुरुष टिम फोयलमा बागमतीले नेपाली सेनालाई पन्छाउँदै स्वर्ण पदक जितेको हो । बागमतीका लागि यो फेन्सिङ तेस्रो स्वर्ण पदक हो । पोखरा रङ्गशालास्थित ब्याडमिन्टन कोर्टमा भएको फाइनल प्रतिस्पर्धामा नेपाली सेनाले रजत पदकमा चित्त बुझाउँदा सुदूरपश्चिम र प्रदेश नं १ ले कास्य पदक प्राप्त गरेका छन् । प्रदेश १ को यो पहिलो पदक हो । फेन्सिङको अङ्कतालिका अनुसार बागमती प्रदेश शीर्ष स्थानमा उक्लेको छ । बागमतीले ३ स्वर्ण, एक रजत सहित ४ पदक प्राप्त गरेको छ । त्यसै गरी आर्मीले दुई स्वर्ण, ४ रजत र ६ कास्य सहित १२ पदक प्राप्त गरेको छ । सशस्त्र प्रहरी १ स्वर्ण, २ रजत र ५ कास्य सहित ८ पदका साथ तेस्रो स्थानमा छ । सुदूरपश्चिम प्रदेश १ स्वर्ण पदक सहित चौथो स्थान छ । त्यसै गरी गण्डकी प्रदेश र प्रदेश नम्बर १ ले एक एक कास्य पदक प्राप्त गरेका छन् ।