काठमाडौँ - प्रदीप भट्टराईको निर्देशनमा तयार भएको ‘महापुरुष’ले शुक्रबार र शनिबार बम्पर व्यापार गरेको छ । दर्शकको सकारात्मक प्रतिक्रिया पाएको ‘महापुरुष’ फिल्मले २ दिनमा साढे २ करोड ग्रस कलेक्सन गरेको निर्माण पक्षले जानकारी दिएको छ ।
फिल्मले ३ दिनको बिदाको भरपूर सदुपयोग गर्ने देखिएको छ। देशभरका मल्टिप्लेक्स हलमा दर्शकको उच्च अकुपेन्सी रहेको निर्माण पक्षले जनाएको छ।
फिल्मले शुक्रबार देशभर एक करोडको ग्रस कलेक्सन गरेको थियो। शनिबार फिल्मको व्यापार साढे एक करोड रहेको निर्माण पक्षले जानकारी दिएको छ । २ दिनमा साढे २ करोड ग्रस कलेक्सन गरेको फिल्मले यो साता लगानी सुरक्षित गर्दै निर्मातालाई मुनाफाको बाटोमा डोर्याउने देखिएको छ ।
आज पनि सार्वजनिक बिदा परेको छ । छठ पर्वको अवसरमा सरकारले सार्वजनिक बिदा दिएको हो । आइतबारको बिहानी शो उच्च अकुपेन्सी रहेको र दिउँसोको शो हाउसफुल रहेको छ ।
एकल बाबुको कथा, बुढ्यौली प्रेम तथा पारिवारिक घटनालाई प्रस्तुत गरिएको फिल्ममा मदनकृष्ण श्रेष्ठ, हरिवंश आचार्य, गौरी मल्ल, राजाराम पौड्याल, अरुण क्षेत्री, अञ्जना बराइलीलगायतको मुख्य भूमिका रहेको छ।
