काठमाडौँ– आईसीसी टी–ट्वान्टी विश्वकपको सुपर १२ को अन्तिम खेलमा भारतले जिम्बावेमाथि ७१ रनको सहज जित निकालेको छ । मेलबर्नमा भारतले दिएको १८७ रनको लक्ष्य पछ्याएको जिम्बावेले १७ ओभर २ बलमा सम्पूर्ण विकेट गुमाउँदै ११५ रन बनायो ।
जिम्बावेका लागि रियान बुरीले ३५ रनको योगदान गरे । त्यस्तै सिकन्दर राजाले ३४ रन जोडे । भारतका लागि रविचन्द्र आश्विनले सर्वाधिक ३ विकेट लिए । त्यस्तै मोहम्द श्वामी र हार्दिक पाड्याले दुई–दुई विकेट लिए । भुवनेश्वर कुमार, अर्शदीप सिंह र अक्षर पटेलले एक–एक विकेट लिए । यसअघि पहिले ब्याटिङ गरेको भारतले निर्धारित २० ओभरमा ५ विकेट गुमाउँदै १८६ रन बनाएको थियो ।
भारतका लागि सुर्यकुमार यादव र केएल राहुलले अर्धशतकीय पारी खेले । २५ बल खेलेका सुर्यकुमारले ६ चौका र ४ छक्का प्रहार गर्दै ६१ रन बनाए । त्यस्तै ३५ बल खेलेका राहुलले ३ चौका र ३ छक्काको सहयोगमा ५१ रन बनाए ।
भारतका लागि विराट कोहलीले २६ रन बनाउँदा हार्दिक पाड्याले १८ रन जोडे । बलिङतर्फ जिम्बावेका लागि सेन विलियम्सले दुई विकेट लिए । त्यस्तै रिचर्ड नाराभा, बेलेसिङ मुर्जाबानी र सिकन्दर राजाले एक–एक विकेट लिए ।
प्रकाशित मिति: बिहीबार, मंसिर ८, २०७९ ०६:२१
प्रतिक्रिया दिनुहोस्
