काठमाडौँ–विश्वका ५० भन्दा धेरै गरिब देशको अर्थतन्त्र नाजुक बन्दै गएको संयुक्त राष्ट्र सङ्घका अधिकारीहरुले बताएका छन् ।
धनी देशहरूले तत्काल सहयोग नगरेमा विश्वका ५० भन्दा बढी गरिब देशको अर्थतन्त्र नाजुक बन्ने र उनीहरू टाट पल्टिने अवस्थामा रहेको संयुक्त राष्ट्र सङ्घका अधिकारीले चेतावनी दिएका बीबीसीले जनाएको छ ।
संयुक्त राष्ट्र सङ्घीय विकास कार्यक्रममा प्रमुख आकम स्टाइनरका अनुसार मुद्रास्फीति, ऊर्जा सङ्कट तथा बढ्दो ब्याजदरका कारण धेरै देश टाट पल्टिने अवस्थामा पुगेका हुन् । सम्भावित आर्थिक सङ्कटले गरिब देशका नागरिकहरूको जनजीवनमा गम्भीर प्रभाव पर्ने उनले बताए ।
श्रीलङ्कामा देखिएको जस्तै अवस्थामा ती देशहरूमा पनि आउन सक्ने उनको भनाइ छ । जलवायु परिवर्तनसम्बन्धी पक्ष राष्ट्रहरूको संयुक्त राष्ट्र सङ्घीय सम्मेलनमा सम्बोधन गर्दै स्टाइनरले आर्थिक सङ्कटको अवस्था आएमा जलवायु सङ्कट समाधान पनि थप कठिन हुने बताए ।
यसले जलवायु सङ्कट समाधानमा थप जटिलता निम्त्याउने उनको भनाइ थियो । इजिप्टमा अहिले जलवायु परिवर्तनसम्बन्धी पक्ष राष्ट्रहरूको संयुक्त राष्ट्र सङ्घीय सम्मेलन चलिरहेको छ ।
प्रकाशित मिति: बिहीबार, मंसिर ८, २०७९ २२:३२
प्रतिक्रिया दिनुहोस्
