गोरखा–नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देशभरको चुनावी परिणाम अपेक्षा गरे अनुसार नआएको टिप्पणी गरेका छन् । ‘अपेक्षा अनुसार नतिजा आएन । गठबन्धन दलहरुले केही गृहकार्य गर्नुपर्ने देखिएको छ । जस्तो परिणामको अपेक्षा थियो, त्यो आएन । अब काठमाडौं गएपछि गठबन्धनको बैठक बस्नुपर्नेछ,’ अध्यक्ष प्रचण्डले भने ।
गोरखाका विजयी उम्मेदवारहरुलाई बधाई तथा शुभकामना दिन आयोजित सभामा उनले अपेक्षा गरेअनुसार परिणाम नआएको बताए । उनले विचार राजनीति सिद्धान्त, एजेण्डा नभई आवेगमा भ्रमित पार्ने संकेत देखा परेको पनि बताए । अध्यक्ष प्रचण्ड स्वंय गोरखा–२ बाट प्रतिनिधिसभमा निर्वाचित भएका छन् ।
प्रचण्डले भने, ‘तपाईंहरुको जिम्मालाई मैले जीवनको अन्तिम समयको अवसर र चुनौतीको रुपमा बुझेको छु । हाम्रो अपेक्षाअनुरुपको नतिजा आएन । नसोचेको केहि कुरा भयो भन्नेछ ।’ ‘सिंहदरबारको अधिकार प्रदेश र स्थानीय तहमा पुगेको थियो । तर, यो निर्वाचनबाट उल्टाउने चेस्टा गरेको देखियो,’उनले भने । राजनीतिक दलहरुले आत्मसमीक्षा गर्न जरुरी रहेको उनको भनाइ छ । उनले भने, ‘अहिले नै सबै बर्बाद भयो भन्ने केही पनि छैन, राजनीतिक दलहरुले गम्भीर रुपमा आत्मसमीक्षा गर्नुपर्ने देखियो । जनताको निम्ति समर्पित हुने नीति तथा कार्यक्रम ल्याएनौं भने देश अप्ठ्यारोमा पर्छ । देश भुमरीमा पर्न सक्छ ।’
नयाँ उदय भएका राजनीतिक दलहरुप्रति लक्षित गर्दै अध्यक्ष प्रचण्डले राजनीतिक एजेण्डा, सिद्धान्त, मूल्यमान्यताको अवमुल्यन हुने खतार बढेको बताए । ‘हामीले उनीहरुलाई गाली या आलोचना गर्ने भन्दापनि एकचोटी राजनीतिक नेतृत्वमा आत्मसमीक्षा गर्नुपर्ने अवस्थाको रुपमा मैले लिएको छु’ उनले भने ‘राजनीतिक नेतृत्वले नै सोच्नुपर्ने बेला आएको छ ।’
गठबन्धन र राजनीतिक दलका अघि अवसर र चुनौती दुबै देखिएको बताउँदै उनले भने, ‘यदी राजनीतिक नेतृत्वले गम्भीर भएर आत्मासमीक्षा गरेर आउने दिनमा जनताको लागि समर्पित हुने नीति योजना, कार्यक्रम नबनाउने हो भने देश अफ्ठ्यारोमा पर्न सक्छ ।’
