काठमाडौं–अर्जेन्टिनी गोलकिपर इमिलियानो मार्टिनेजले समूह ‘सी’अन्तर्गत मेक्सिकोविरुद्धको खेल दक्षिण अमेरिकी टिमका लागि विश्वकपको पहिलो फाइनल हुने बताएका छन् ।
पहिलो खेलमा साउदी अरबविरुद्ध पहिलो खेलमा २–१ ले पराजित भएको दुई पटकको च्याम्पियन अर्जेन्टिना समूह चरण पार गर्न जित्नै पर्ने दबाबमा छ ।
लुसेल रंगशालामा त्यो नतिजा अर्जेन्टिनाले विश्वकपका पछिल्ला ६ खेलमा चौथो पराजय हो । त्यसबाहेक एक खेलमा जित र एक खेल बराबरी खेलेको छ । जुन त्यसअघिका २५ खेलमा भोगेको हार बराबरी हो ।
त्यो हारबाट अर्जेन्टिनाको ३६ खेलको अपराजित यात्रामा पूर्णविरामसमेत लगाएको थियो । विश्व फुटबलको सबैभन्दा लोकप्रिय टिमकोरूपमा कतार पुगेको अर्जेन्टिना अब छिट्टै बाहिरिने खतरामा पुगेको छ ।
मेक्सिकोविरुद्धको विगत अर्जेन्टिनाको पक्षमा छ । अर्जेन्टिनाले पछिल्ला १० खेलमा मेक्सिकोसँग अपराजित छ । जसमा सन् २००४ को कोपा अमेरिकामा हासिल गरेको जित पनि समावेश छ । सन् १९३०, २००६ र २०१० मा भएका भेटमा पनि अर्जेन्टिनाले जित निकालेको छ ।
मेक्सिकोका लागि पछिल्लो समय विश्वकपमा गोल गर्नु प्रमुख समस्या बनिरहेको छ । उत्तर अमेरिकी मुलुकले खेलेका पछिल्ला तीन खेलमा गोल गर्न सकेको छैन । समूह ‘सी’को पहिलो खेलमा मेक्सिको पोल्यान्डसँग गोलरहित बराबरीमा रोकिएको थियो । त्यो खेलमा पोलिस कप्तान रोबर्ट लेवान्डोस्कीले प्रहार गरेको पेनाल्टी गुइलेर्मो ओचोवाले बचाएका थिए ।
सन् १९८६ मा क्वार्टरफाइनल पुगेको मेक्सिको त्यसपछिका सात संस्करणमा फेरि त्यहाँ पुग्न सकेको छैन । यदि अर्जेन्टिनाविरुद्ध जित निकाल्न सके अन्तिम १६ मा पुग्ने करिब निश्चित हुनेछ । त्यति मात्रै होइन, विश्वकपको प्रमुख दाबेदार मानिएको अर्जेन्टिनाको यात्रासमेत समूह चरणमा टुङ्गिने छ । मेक्सिको सन् २०१० को विश्वकपको बदला लिने होडमा हुनेछ ।
