काठमाडौ– भारतीय अभिनेता विवेक ओबरोय बुधबार नेपाल आउन लागेका छन् । ओवरोयले भिडियो सन्देश गर्दै एक साता बस्ने गरी आमाबुवा, श्रीमती प्रियंका अल्वा, छोरा विवान र छोरी अमेयासँग नेपाल घुम्न आउन लागेको बताएका छन् ।
नेपाल भ्रमणको बारेमा आफ्नो उत्साह व्यक्त गर्दै ओबरोयले भगवान बुद्धको जन्मस्थल लुम्बिनीमा हुने भेटघाट तथा अभिवादन कार्यक्रममा सहभागी हुने बताएका छन् । उनले सगरमाथा आधार शिविर, पोखरा, लुम्बिनी, काठमाडौंको पशुपतिनाथ मन्दिरलगायतका ठाउँ घुम्न आतुर रहेको पनि बताएका छन् । ओबेरोयले आफ्नो नेपाल भ्रमणले नेपालको पर्यटन प्रवद्र्धनमा टेवा पुग्ने विश्वास व्यक्त गरेका छन् ।
‘नेपाल भ्रमणपछि अरुलाई पनि नेपाल घुम्न र अनुभव गर्न सुझाव दिनेछु । नेपालसँग भारतको सुन्दर र बलियो सम्बन्ध छ । हामी नेपालीहरू जस्तै छौं र नेपालीहरू हामी जस्तै छन्,’ ओबेरोयले भिडियो सन्देशमा भनेका छन्, ‘२० वर्षको अभिनय करियरमा नेपाली दर्शकले दिएको मायालाई सम्झेर म नेपाल आउन लागेको हुँ ।’
सन् २००२ मा राम गोपाल वर्माको ग्याङ्स्टर ड्रामा कम्पनीबाट बलिउडमा डेब्यु गरेका ओबरोयले दुईवटा फिल्मफेयर अवार्ड जितेका छन् । हालै भारतीय प्रधानमन्त्री नरेन्द्र मोदीको बायोपिक फिल्म ‘पीएम नरेन्द्र मोदी’मा पनि उनी देखिएका छन् ।
ओबरोय व्यवसायी पुनम यादवको पहलमा नेपाल आउन लागेका हुन् । उनी नेपालमा पुनमको मिट एण्ड ग्रीट लगायत केही कार्यक्रममा पनि सहभागी हुनेछन् । ओबरोय चर्चित बलिउड अभिनेता हुन् । उनले तेलगु, मलाया, कन्नड लगायत थुप्रै फिल्म अभिनय गरेका छन् ।
