काठमाडौँ– कतारमा जारी २२ औं विश्वकप फुटबलको फाइनल आइतबार (आज) राति हुँदैछ । तेस्रोपल्ट विश्वकप फुटबलको उपाधि जित्ने लक्ष्य साथ दुवै देशमा मैदानमा उत्रिदै छन् । अर्जेन्टिना र फ्रान्सको टिम आमनेसामने भएर हुने खेललाई आमदर्शकका लागि पनि चासो र कसले जित्ला भन्ने विषय बनेको छ ।
अर्जेन्टिनाले पहिलोपटक सन् १९७८ मा विश्वकप आयोजना गर्ने अवसर पाएको थियो । यही विश्वकपको उपाधि अर्जेन्टिनाले जित्दै आफ्नो इतिहास बनाएको थियो । सन् १९८६ मा मेक्सिकोमा भएको विश्वकपमा जर्मनीलाई पराजित गर्दै अर्जेन्टिनाले दोस्रोपटक उपाधि जितेको थियो ।
३६ वर्षपछि लियोनल मेसीको कप्तानीमा रहेको अर्जेन्टिना तेस्रोपटक उपाधि जित्ने दाउमा छ । सन् २०१४ मा विश्वकपको फाइनलमा अर्जेन्टिना जर्मनीसँग अतिरिक्त समयमा १–० ले पराजित भएको थियो । अर्जेन्टिना विश्वकपमा दुईपटक विश्वकप जित्दा तीनपटक उपविजेता बनेको छ । तीनपटक उपविजेता हुँदा दुईपटक फाइनलमा अर्जेन्टिना जर्मनीसँग सन् १९९० र २०१४ मा पराजित भएको छ । त्यस्तै, एकपटक भने सन् १९३० मा भएको विश्वकपमा उरुग्वेसँग पराजित हुँदै अर्जेन्टिना उपविजेता बनेको थियो ।
पाँचपटक विश्वकप खेल्दासमेत मेसीले ट्रफी उचाल्न पाएका छैन । आजको खेलमा उनले यो मौका गुमाउन नचाहने गरी मैदानमा उत्रिदैछन् । उता, फ्रान्सका युवा स्टार खेलाडी केलियन एम्बाप्पे भर्खर २३ वर्ष लागेका छन् । पहिलोपटक सन् २०१८ को विश्वकप खेलेका एम्बाप्पेले ट्रफी चुमिसकेका छन् । कतारमा जारी विश्वकपमा उनी पनि दोस्रो पटक विश्वकपको ट्रफी उचाल्ने लक्ष्यका साथ मैदानमा उत्रिदैछन् ।
घरेलु मैदानमा विश्वकपको उपाधि जितेको फ्रान्सले त्यसपछि दोस्रोपटक विश्वकप जित्न २० वर्ष लाग्यो । २०१८ मा विश्वकप फुटबलको उपाधि जितेको फ्रान्स पनि लगातार दुईपटक विश्वकपको उपाधि जित्दै इतिहास रच्ने लक्ष्यमा छ । सन् १९५८ र १९६२ मा ब्राजिलले लगातार दुईपटक विश्वकपको उपाधि जित्दै इतिहास बनाएको थियो । फ्रान्स सन् १९५८ र १९८६ मा दुईपटक विश्वकपमा तेस्रो भएको छ । त्यस्तै, सन् १९८२ को विश्वकपमा पनि फ्रान्स सेमिफाइनल पुग्दै चौथो भएको थियो ।
सन् २००६ मा जर्मनीमा भएको विश्वकपको फाइनलमा फ्रान्स पुगेको थियो तर विश्वकपको उपाधि दोस्रोपटक उचाल्ने फ्रान्सको सपना इटालीले ब्रेक लाग्यो ।
१३ औ पटक भिड्दै
फुटबल खेलमा अर्जेन्टिना र फ्रान्सबीच १२ पटक प्रतिस्पर्धा भइसकेको छ । ती खेलमध्ये अर्जेन्टिना सर्वाधिक ६ पटक विजयी हुँदा फ्रान्सले तीनपटक मात्र जितेको छ । यी देशबीच तीन खेल बराबरीमा भएका छन् भने, सन् २०१८ मा फ्रान्सले अर्जेन्टिनालाई ४–३ ले हराएको थियो । विश्वकपमा भएको तीनमध्ये दुई खेल अर्जेन्टिनाले जितेको थियो । विश्वकपको पहिलो संस्करणदेखि नै सहभागिता जनाउँदै आएको फ्रान्सका लागि अविस्मरणीय र ऐतिहासिक विश्वकप भने सन् १९९८ मा भएको थियो ।
