काठमाडौँ– चालु आर्थिक वर्षको ५ महिनामा ‘नो अब्जेक्सन लेटर (एनओसी’ लिनेको संख्या ३८ हजारभन्दा बढी छ ।
शिक्षा, विज्ञान तथा प्रविधि मन्त्रालयको तथ्यांकअनुसार विदेशमा उच्च शिक्षा आर्जन गर्न चाहने ३८ हजारभन्दा बढीले एनओसी लिएका हुन् ।
मन्त्रालयअन्तर्गतको वैदेशिक अध्ययन प्रमाणीकरण शाखाका अनुसार गत साउनदेखि मङ्सिर मसान्तसम्म एनओसी लिएकाहरूबाट राज्यले ८ करोड २१ लाख ३२ हजार रुपैयाँ राजस्व संकलन गरेको छ। यस अवधिमा १ हजार ५५८ जनाको नो अब्जेक्सन लेटर रद्द भएको छ।
शाखाका अनुसार गत आर्थिक वर्ष २०७८/७९ मा करिब १ लाख १४ हजार जनाले ‘नो अब्जेक्सन लेटर’ लिएका थिए ।
पछिल्लो समय यस अवधिमा ५९ मुलुकका लागि ‘नो अब्जेक्सन लेटर’ लिइएको छ। सबैभन्दा बढी अस्ट्रेलियाका लागि यस्तो पत्र लिनेहरू छन् । अस्ट्रेलिया जान १० हजार ७९९ जनाले पत्र लिएका छन् ।
जापानका लागि ६ हजार ६२५ जना, क्यानडाका लागि ६ हजार ५३१ जना, बेलायतका लागि ५ हजार ३०४ जनाले यस्तो पत्र लिएका छन् । भारतका लागि १ हजार ९० जना, युएईका लागि ९१३ जना, रुसका लागि ९७२ जना, कोरियाका लागि ७४४ जना तथा न्युजिल्यान्डका लागि ३९६ जनाले ‘नो अब्जेक्सन लेटर’ लिएका छन् ।
सबैभन्दा कम अल्बानिया, अजरबैजान, आइसल्यान्ड, जर्जिया, पाकिस्तान र स्विट्जरल्यान्डका लागि १/१ जनाले यस्तो पत्र लिएका छन् ।
अमेरिकाका लागि १ हजार ५५९ जनाले मात्र ‘नो अब्जेक्सन लेटर’ लिनुले विद्यार्थीको चाहना अमेरिकातर्फ घटेको देखाउँछ । कुनै बेला सबैभन्दा बढी ‘नो अब्जेक्सन लेटर’ लिने मुलुकमा अमेरिका पर्थ्याे । पछिल्लो तथ्यांकले विद्यार्थीको आकर्षण अस्ट्रेलियातर्फ बढेको प्रष्ट देखाएको छ ।
