विराटनगर– मोरङका उद्योगी व्यावसायीले नेपाल राष्ट्र बैंक प्रादेशिक कार्यालय विराटनगरको प्रवेशद्वार अगाडि धर्ना दिएका छन् ।
बैंकको चर्को ब्याजदरका विरुद्ध आन्दोलनमा उत्रिएका उनीहरू धर्नामा बसेका हुन् । गेट अगाडि धर्ना बसेका उद्योगी व्यावसायीले बैंकका कर्मचारीलाई कार्यालय प्रवेशमा रोक लगाएका छन् । सोमबार बिहान ९ बजेदेखि धर्ना सुरु धर्ना बेलुका ४ बजेसम्म हरने उनीहरुले जनाएका छन् ।
बैंकको चर्को ब्याजदर घटाउनु पर्ने माग गर्दै उद्योगी व्यावसायीले बिहीबारदेखि निरन्तर आन्दोलन गरिरहेका छन् । आन्दोलनकै क्रममा उनीहरुले राष्ट्र बैंकको प्रवेशद्वारका लागि धर्ना दिएका हुन् । बैंकको ब्याजदर घटाउन माग गर्दै मोरङ व्यापार संघ, उद्योग संगठन मोरङ र नेपाल उद्योग परिसंघ प्रदेश १ सहित तीन दर्जन बढी संघसंस्थाले बिहीबारदेखि आन्दोलनमा उत्रिएका हुन् ।
सरकार र नेपाल राष्ट्र बैंकको नीतिका कारण निजी क्षेत्र विस्थापित हुने अवस्था आएपछि चर्को ब्याजदर विरुद्ध सडक संघर्षमा उत्रनु परेको मोरङ व्यापार संघका अध्यक्ष नविन रिजालले बताए । एकल अंकको ब्याजदर कायम गर्नुपर्ने उनीहरुको माग छ । पछिल्लो समय बैंकको ब्याजदर १६ प्रतिशतसम्म पुगेको उनीहरुको गुनासो छ । स्प्रेड दर र संस्थागत ब्याजदर २ –२ प्रतिशत कायम गर्नुपर्नेलगायत माग छन् ।
