काठमाडौँ–लुम्बिनी अल स्टार्सले नेपाल टी–२० लिगमा मंगलबार पोखरा एभेन्जर्सलाई तीन विकेटले पराजित गरेको छ । त्रिवि क्रिकेट मैदानमा टस हारेर ब्याटिङको निम्तो पाएको पोखराले २० ओभरमा १३३ रनको योगफल तयार गर्न ९ विकेट खर्चिएको थियो ।
जवाफी ब्याटिङमा उत्रिएको लुम्बिनीले इनिङको अन्तिम बलमा शाड्ली भान स्कालक्यकको छक्कासहित लक्ष्य पूरा गरेको छ । लुम्बिनीलाई अन्तिम बलमा जितका लागि ५ रन आवश्यक थियो । सोही बलमा शाड्लीले विशाल छक्का प्रहार गर्दै लुम्बिनीको तेस्रो जित सुनिश्चित गरे ।
लुम्बिनीका लागि ११ बलको सामना गरेका शाड्लीले चार छक्कासहित अविजित ३१ रनको इनिङ खेल्दा म्यान अफ दी म्याच बने ।
पहिलो खेलमा फार वेस्टर्न युनाइटेडलाई ६७ रनले पराजित गरेको लुम्बिनीले दोस्रो खेलमा विराटनगर सुपर किङ्ग्समाथि ३ रनको जित निकालेको थियो । पहिलो खेलमा काठमाडौं नाइट्ससँग २६ रनले हारेको पोखरा दोस्रो खेलमा जनकपुर रोयल्ससँग ५ विकेट स्तब्ध भएको थियो ।
