काठमाडौँ- कीर्तिपुरको त्रिवि क्रिकेट मैदानमा जारी पहिलो संस्करणको टि-२० क्रिकेटमा लुम्बिनी अल स्टार्सले लगातार तेस्रो जित निकालेकाे छ ।
आज मंगलबार भएको पहिलो खेलमा लुम्बिनीले पोखरा एभन्जर्सलाई ३ विकेटले पराजित गरेको हो । जितका लागि पोखराले दिएको १ सय ३४ रनको लक्ष्य लुम्बिनीले अन्तिम ओभरको अन्तिम बलमा ७ विकेट गुमाउँदै पूरा गर्याे ।
लुम्बिनीका कुशल भुर्तेलले ३९ रन, भान शाल्कविकले अविजित ३१ रन बनाए । त्यस्तै उन्मुक्त चन्दले २२ रन बनाउँदा अनिल शाहले १९ रन बनाए ।
पोखराका लागि विपिन खत्री र कुशल मल्लले समान २/२ विकेट लिए । प्रतीश जिसी,अभिमन्यु मिथुन र जाहिर खानले समान १/१ विकेट लिए ।
यसअघि ब्याटिङ गरेकाे पोखराले सबै ओभर खेल्दै ९ विकेटको क्षतिमा १ सय ३३ रन बनाएको थियो । त्यसका लागि कुशल मल्लले ३१ बलमा सर्वाधिक ६१ रन बनाए ।
यो जितसँगै लुम्बिनी ६ अंक जोड्दै तालिकाको शीर्ष स्थानमा छ भने लगातार तेस्रो हार बेहोरेको पोखरा जितवीहिन हुँदै तालिकाको अन्तिममा छ ।
