सिन्धुली–दक्षिण कोरियाबाट सतप्रतिशत शुद्ध नस्लका गाई नेपालका किसानहरूलाई वितरण गरिएको छ । हेफर इन्टरनेशनलद्वारा नेपालको पहलमा नेपाल सरकारको स्वीकृतिमा हेफर कोरियाबाट सतप्रतिशत शुद्ध नस्लका गाई नेपालमा ल्याएर कमलामाई नगरपालिका सिन्धुलीका किसानलाई वितरण गरेको हो । दक्षिण कोरियाबाट २ पटक गरेर होलिस्टिन फ्रिजनका ६ वटा बाच्छा र ५७ वटा कोरली गाई गरी ६३ वटा कोरली गाई र बहर नेपाल ल्याएर वितरण गरिएको हो । हेफरका अनुसार अझै होलिस्टिन फ्रिजनका २२ वटा कोरली गाई आउन बाँकी छ । हेफर कोरियाबाट प्राप्त गाई ७ पुसमा नै कोरिया सरकारको तर्फबाट नेपाल सरकारलाई हस्तान्तरण गरी नेपाल सरकारले ९ पुसमा कमलामाई नगरपालिका सिन्धुलीलाई हस्तान्तरण गरी गाई सिन्धुली पु¥याएको छ ।
उत्पादनको हिसाबले कोरियाका टप (परीक्षण भएका) २ वटा बहर पनि केही दिनपछि आउने हेफरले बताएको छ । नेपालमा पहिलो पटक शुद्ध नस्लका धेरै गाई आएको हेफरले बताएको छ । हेफर इन्टरनेशनल नेपालका भेटनरी चिकित्सक भोला श्रेष्ठले नेपाली स्थानीय गाईलाई विस्थापित गर्ने नभइ नस्ल सुधार गरी संरक्षण गर्ने उद्देश्यले गाईहरू ल्याएको बताए । उनले दक्षिण कोरियाबाट ल्याएका सतप्रतिशत शुद्ध नस्लका गाई नस्ल सुधारको लागि ल्याएको बताए ।
उनले नेपालको स्थानीय गाईको संरक्षण गर्ने काम नेपाल कृषि अनुसन्धान परिषद् पशु सेवा विभागले गरिरहेको बताए । उनले नेपालमा रहेको ७३ लाख गाई मध्ये करिव २० प्रतिशत मात्रै गाई उन्नत जातका रहेको बताए । श्रेष्ठले नस्ल सुधारका लागि विदेशबाट गाई ल्याउँदैमा स्थानीय प्रजातिका गाई लोप नहुने बताए । उनले स्थानीय गाई लोप हुन नदिनको लागि राष्ट्रिय पशु प्रजनन तथा आनुवंशिक अनुसन्धान केन्द्र र पशु सेवा विभागले स्थानीय गाईको अनुवंशिक स्रोतहरूको संरक्षण गरी नस्ल सुधारको काम समेत गरिरहेको बताए ।
नेपालमा दूध उत्पादन बढाउन आवश्यक रहेको भन्दै उनले शुद्ध नस्ल भएका उत्पादन क्षमता बढी भएका गाई ल्याएको बताए । दूधको उत्पादकत्व बढाउन वंशानुगत क्षमता तथा आहारा, स्वास्थ्य र पालनपोसनमा भर पर्ने उनले बताए । उनले कोरियाबाट आएका गाई जेनेटिक रूपमा उच्च उत्पादकत्व भएका बहरलाई न्युक्यलेस हटको रुपमा स्थापना गरेर उत्पादन बढाउने उद्देश्य रहेको बताए । नेपाली गाईपालक किसानहरुलाई उन्नत नश्लको बहरबाट सिमेन उत्पादन गरेर जन्मने बाच्छाहरु राम्रो हुन्छ भन्ने अपेक्षासहित काम गरिने उनको भनाइ छ ।
श्रेष्ठले नश्ल राम्रो भएको गाई ल्याएर पालनपोषण नेपालमा भएको गाईको भन्दा पनि नराम्रो हुने भन्दै किसानलाई तालिम समेत दिएको उल्लेख गरे । कोरियन गाई पाल्नको लागि सिन्धुलीका किसानलाई समूहमा आवद्ध गरेर गाई वितरण गरिएको बताए । उनले किसानहरुलाई उन्नत गाई पाल्ने प्रविधि,स्वच्छ दूध उत्पादन प्रविधि र आहारा व्यवस्थापनको बारेमा तालिम दिएको बताए ।
गाईहरूलाई आवश्यक पर्ने शुद्ध नश्लको सिमेन (वीर्य) पनि कोरियाबाटै प्राप्त भएको छ । यी गाईहरु क्षमता ८ देखि १६ हजार लिटर प्रतिबेत रहेको जानकारी प्राप्त भएको छ ।
