काठमाडौँ– वैदेशिक रोजगारीमा जाने कामदारलाई सरकारले अभिमुखीकरण तालिम अनिवार्य लिएर मात्र जान आग्रह गरेको छ ।
अभिमुखीकरण तालिम नलिई गएका कामदार रोजगारदाता देशमा समस्यामा पर्ने, घाइते हुने र मृत्युसम्मका समस्या बढिरहेको वैदेशिक रोजगार विभागले जनाएको छ । वैदेशिक रोजगारीमा जानेका लागि अभिमुखीकरण तालिम मापदण्डअनुसार सञ्चालन नहुँँदा तालिम नाम मात्रको भएको विभागले बताउँदै आएको छ ।
काठमाडौं उपत्यकासहित देशका विभिन्न जिल्लामा अनुगमन गर्दा मापदण्डअनुसार अभिमुखीकरण तालिम सञ्चालन नभएको पाइएको वैदेशिक रोजगार विभागका महानिर्देशक उमाकन्त आचार्यले जानकारी दिए ।
अभिमुखीकरण तालिम मापदण्डअनुसार सञ्चालन नभएको गुनासो आएपछि विभागले देशका विभिन्न ठाउँमा रहेका तालिम प्रदायक संस्थामा अनुगमन गरेको उनले बताए । ‘वैदेशिक रोजगारीमा जाने श्रमिकले अनिवार्य रूपमा अभिमुखीकरण तालिम लिनुपर्ने सरकारी नियम छ । अभिमुखीकरण तालिम सञ्चालन कार्यविधि २०७६ अनुसार तालिम सञ्चालन हुनुपर्ने भए पनि यसअनुसार नभएको पाइयो’, उनले भने, ‘वैदेशिक रोजगार विभागसँग अनुमति लिएर संस्थाले अभिमुखीकरण तालिम नाम मात्रको गरेको पाइयो । अनुगमनका क्रममा धेरै कमजोरी देखियो । अब त्यस्ता संस्थालाई कारवादी हुँदै छ ।’
वैदेशिक रोजगारीमा जाने कामदारका हकमा अभिमुखीकरण तालिम अनिवार्य हो । त्यसका कारण पनि सबैले तालिम लिएर मात्र विदेशिन उनको आग्रह छ । वैदेशिक रोजगारीमा जाने कामदारले ३ दिने अभिमुखिकरण तालिम लिनुपर्ने कानुनी व्यवस्था छ । तर, तालिम सञ्चालन गदै आएका संस्थाले विदेशिने कामदारसँग रकम लिएर तालिम दिएको प्रमाणपत्र दिने गरेको विभागले जनाउँदै आएको छ ।
विभागले १५ दिनभित्र कार्यविधिले तोकेको मापदण्ड पूरा गरी वैदेशिक रोजगारीमा जाने कामदारलाई दिएको तालिमको प्रमाण पेश गर्ने अभिमुखीकरण तालिम प्रदायकहरूलाई भनेको छ । अभिमुखीकरण तालिम प्रदायक संस्थाको अनुगमन अबको केही समयभित्रै अनलाइनमार्फत् सुरु गरिने पनि विभागले जनाएको छ ।
अहिले देशभरबाट २ सयभन्दा धेरै अभिमुखीकरण तालिम प्रदायकहरूले वैदेशिक रोजगारीमा जाने कामदारलाई तालिम दिदै आएका छन् । वैदेशिक रोजगारीमा जाने कामदारले अभिमुखीकरण तालिम लिएबापत ७०० रुपैयाँ वैदेशिक रोजगार कल्याणकारी कोषमा जम्मा गर्नुपर्छ ।
