काठमाडौँ – डाक्टर कपिल रिजालको डेब्यु निर्देशकीय चलचित्र ‘ह्यारी कि प्यारी’को पहिलो गीत ‘धरहरा’ सार्वजनिक भएकाे छ । बुधबार राजधानीमा आयोजित कार्यक्रममा सिनेमाको गीत रिलिज गरिएको हो ।
सार्वजनिक गीतमा अभिनेत्री रेखा थापाले नृत्य गरेकी छिन् । लामो समयपछि गेस्ट रोलमा नै भए पनि पर्दामा फर्किन पाएकामा उनले खुसी व्यक्त गरिन् ।
पछिल्लो समय आफू अभिनयसँगै राजनीतिमा पनि सक्रिय भएकाले सिनेमामा फर्किन समय लागेको थापाको भनाइ छ । चाँडै आफू मुख्य अभिनेत्रीको रूपमा पर्दामा फर्किने तयारी भइरहेको उनले बताइन् ।
शिखर सन्तोषकोे संगीत, डाक्टर भोला रिजालको शब्द रचना रहेको गीतमा सपनकुमार राई र मीना निरौलाको स्वर सुन्न सकिन्छ । कविराज गहतराजको कोरियोग्राफी रहेको गीतमा अभिनेत्री थापासँगै अभिनेताद्वय जितु नेपाल र विजय बराल पनि फिचर्ड छन् ।
बिआर प्रोडक्सनकको प्रस्तुतिमा निर्माण भएको सिनेमामा जितु र विजयका अलवा साम्राज्ञी राज्यलक्ष्मी शाह, लक्ष्मी गिरी, सुवास गजुरेल, नरेश पौडेल, रञ्जना भट्टराई, समीक्षा पौडेल, रमेश अधिकारी, डिल्लीराम खनालको पनि अभिनय छ । सिनेमामा अभिनेत्री रेखा थापा विशेष भूमिकामा प्रस्तुत छिन् ।
डाक्टर कपिल रिजालको प्रस्तुतिमा निर्माण भएको सिनेमामा रिजाल स्वयंको कथा तथा निर्देशन, सुदीप बराल, गिरिराज घिमिरे, डाक्टर रिजाल, अभिमन्यू निरवीले मिलेर पटकथा र संवाद लेखेका हुन् । दन्त चिकित्सक डाक्टर कपिल रिजालले यही सिनेमाबाट निर्देशनमा डेब्यु गर्दै छन् ।
सिनेमामा डाक्टर भोला रिजालको गीत रचना, शिखर सन्तोष र युग भुसालको संगीत, सपनकुमार राई, सौरभ दास, थोम्सन एन्ड्रयुज, मीना निरौला र देवाञ्जली जोशीको गायन र कविराज गहतराजको कोरियाग्राफी छ । सुदीप बरालले छायांकन गरेको सिनेमालाई अर्जुन जिसीले सम्पादन गरेका हुन् ।
विजय बस्यालले पोस्टर डिजाइन गरेकको सिनेमाको पोस्ट प्रोडक्सनको सम्पूर्ण काम मुम्बईमा गरिएको हो ।
