काठमाडौँ– गृह मन्त्रालयको निर्देशनपछि मापदण्डविपरीत खटिएका १९४ सुरक्षाकर्मी फिर्ता भएका छन् ।
उपप्रधान एवं गृहमन्त्री रवि लामिछानेको सचिवालयले दिएको जानकारी अनुसार बिहीबारसम्ममा नेपाल प्रहरीका १०३ र सशस्त्र प्रहरी बलका ९१ जना सुरक्षाकर्मी गरी जम्मा १९४ सुरक्षाकर्मी प्रहरी प्रधान कार्यालय, नक्सालमा फिर्ता भएका हुन् ।
सुरक्षाकर्मी फिर्ता भएसँगै मन्त्रालयका नीति, योजना अनुगमन तथा मूल्यांकन महाशाखाका सह–सचिव डा.भीष्मकुमार भूसालले सामाजिक सञ्जालमार्फत १९४ सुरक्षाकर्मी घरेलु सेवकबाट पुनः राष्ट्रसेवामा फिर्ता हुन पाएको बताएका छन् । उनले लेखेका छन्, ‘हुनेरहेछ त। राज्यको सेवाका लागि खटिनुपर्ने १९४ सुरक्षाकर्मी कसैको घरेलु सेवकबाट पुनः राष्ट्रसेवामा फिर्ता हुन पाएका छन् ।’
मन्त्रालयले बुधबार (हिजो) दिएको निर्देशन अनुसार नेपाल प्रहरी र सशस्त्र प्रहरी बलले कर्मचारी र सुरक्षाकर्मीको व्यक्तिगत सुरक्षामा मापदण्ड विपरित खटिएका प्रहरीलाई फिर्ता भएका हुन् । मन्त्रालयले विज्ञप्तिमार्फत बहालवाला तथा पूर्वकर्मचारी र सुरक्षाकर्मीले व्यक्तिगत सुरक्षाका लागि पाएको सुरक्षाकर्मीमा मापदण्ड विपरीत भए फिर्ता गर्न निर्देशन दिएको थियो ।
