काठमाडाैँ- काठमाडौं नाइट्सलाई हराउँदै लुम्बिनी अल स्टार्सले नेपाल टि-२० मा लगातार पाँचौँ जित निकालेको छ ।
त्रिवि क्रिकेट मैदानमा जारी नेपाल टि–२० खेल अन्तर्गत शुक्रबार भएको खेलमा लुम्बिनीले काठमाडौंलाई ३५ रनले पराजित गरेको हो ।
लुम्बिनीले दिएको १५१ रनको लक्ष्य पछ्याएको काठमाडौँले निर्धारित २० ओभरमा ८ विकेट गुमाउँदै ११५ रन जोडेर पराजयको सामना गरेको हो । काठमाडौंका लागि अज्मतुल्लाह ओमारजाईले सर्वाधिक ३८, सुमन गौतमले १८, एलेक्स ब्लेकले ११ र वसिर अहमदले १० रन जोड्दा कमल ऐरी १९ रनमा अविजित रहे ।
लुम्बिनीको जितमा उत्कृष्ट बलिङ गर्दै हर्मितसिंहले ४ ओभरमा १ मेडन राख्दै ७ रन खर्चिएर ३ विकेट लिए । किशाेर महत्तो, सेड्ली भान स्केल्कवेक, तिलक भण्डारी र ह्यारि टेकटरले समान १/१ विकेट लिए ।
यसअघि टस जितेर ब्याटिङ गरेकाे लुम्बिनीले निर्धारित २० ओभरमा ८ विकेट गुमाएर १५० रन जोडेको थियो । लुम्बिनीका लागि कप्तान दीपेन्द्रसिंह ऐरीले सर्वाधिक ४०, लाहिरु मिलन्था २५, कुशल भुर्तेलले १९, अनिल शाह १३ हर्मितसिंहले १२ जोड्दा सेड्ली भान स्केल्कवेक २१ रनमा अविजित रहे ।
