काठमाडौं– 'रेट्रो ग्रुप'को व्यानरमा निर्माण गर्न लागिएको चलचित्र ‘द आउट ल’ निर्माण घोषणा गरिएको छ ।
निर्माण टिमले अंगेजी नयाँ वर्षको सन्दर्भ पारेर यो चलचित्र निर्माण गर्ने घोषणा गरेको हो । साथै, चलचित्रको 'थिम टिजर' र 'फस्टलुक पोस्टर'समेत सार्वजनिक गरिएको छ ।
अभिनेता सुशील श्रेष्ठ, शिक्षा सर्गौंला, नरेश पौडेल, सुमन भण्डारी, हेम गुरुङ, विशाल पहारी, महेश त्रिपाठी, लगायतका कलाकारको मुख्य भुमिका रहने ‘द आउट ल’ पुर्ण एक्सन–थ्रिलर जनरामा निर्माण हुनेछ । विक्की महर्जनको निर्देशनमा निर्माण हुन लागेको यो चलचित्रले कानुन नमान्ने व्यक्तिको कथा बोल्ने निर्माण पक्षले बताएको छ ।
कोरोना महामारीपछि अभिनेता सुशीलको लागि यो कम ब्याक प्रोजेक्ट बन्नेछ । सन् २०१५ मा होस्टेल रिटन्र्सबाट अभिनय करिअर सुरु गरेका सुशीलले सायद–२, कारखाना र बादशाह जुटमा समेत अभिनय गरेका छन् । त्यस्तै, चर्चित मोडल शिक्षालाई अहिलेसम्म कुनैपनि चलचित्रमा दर्शकले देख्न पाएका छैनन् । उनको यो डेब्यू चलचित्र हो ।
शशांक खड्का र अमित अग्रहरीको लगानीमा निर्माण हुने यस चलचित्रका कार्यकारी निर्माता विनोद कडायत हुन् । कडायत चलचित्र प्रेम गीत–३ का आर्ट डिरेक्टर समेत हुन् । संयोगको कुरा त के छ भने यो चलचित्र निर्माण टिममा अधिकांश फिल्म अध्ययन गरेका ३० बर्ष मुनिका युवाहरु रहेका छन् ।
निर्माता शशांक खड्काले चलचित्रको छायांकनका लागि सम्पुर्ण तयारी पुरा भएको बताए । ‘चलचित्रको कथा असाध्यै दमदार छ । 'युवालक्षित कथावस्तु रहेको छ', उनले भने, 'चलचित्र निर्माण टोलिमा धेरैजसो पढेका र युथ भएकाले चलचित्रको आउटपुट राम्रो निस्कने विश्वास छ ।'
दुई करोड हाराहारी बजेट खर्च हुने अनुमान गरिएको यो चलचित्र दशैंमा प्रदर्शन गर्ने निर्माण पक्षले जानकारी दिएको छ ।
यस्तो छ टिजर–
