पोखरा– गण्डकी अञ्चलका तत्कालीन अञ्चलाधीश शंकरराज पाठकले पोखरामा अन्तर्राष्ट्रिय विमानस्थल बनाउन तत्कालीन राजा वीरेन्द्रसँग २०३२ सालमा प्रस्ताव गरेका थिए ।
बेलायत भ्रमणबाट फर्केका पाठकको उक्त प्रस्ताव राजा वीरेन्द्रले सुरुमै अस्वीकार गरे । पाठकले अन्तर्राष्ट्रिय विमानस्थल बनाउन राजा वीरेन्द्रसँग विभिन्न माध्यमबाट प्रयास गर्दा ७ दिनपछि उनै वीरेन्द्रले पाठकलाई बोलाएर विमानस्थलको भावी रणनीतिसँगै आवश्यकताका बारेमा सोधखोज गरे ।
पाठकले ३० वर्षपछिको जनसङ्ख्याको सम्भावना र उडान चापको बारेमा जानकारी गराएपछि अन्ततः वीरेन्द्र उनकाे प्रस्तावमा राजी भएको पर्यटन मन्त्रालयको अन्तर्राष्ट्रिय विमानस्थल सुधारसम्बन्धी प्रतिवेदनमा उल्लेख छ ।
२०३२ सालमा पाठकले ७ अर्ब लागतमा विमानस्थल निर्माण हुन सक्ने गरी अन्तर्राष्ट्रिय विमानस्थलको खाका प्रस्तुत गरेका थिए ।
तत्कालीन अञ्चलाधीश पाठकले ७ देशमा सञ्चालन भएका अन्तर्राष्ट्रिय विमानस्थल र अन्तर्राष्ट्रिय उडानको सम्भावनासमेत प्रस्ताव गरेपछि राजा वीरेन्द्र विमानस्थल बनाउने योजनामा राजी भएको प्रतिवेदनमा भनिएको छ ।
तत्कालीन समयमा ३ हजार १०६ रोपनी जग्गा अधिग्रहण गरिएको थियो । पछि ६२९ रोपनी अधिग्रहण भयो । पटकपटक गरेर ४ हजार रोपनी जग्गा अधिग्रहण गरी २२ अर्ब रुपैयाँमा अहिले विमानस्थल निर्माण गरिएको हो ।
२२ अर्ब रुपैयाँ लागतमा विमानस्थल निर्माण भएसँगै पोखरबासीले करिब ५० वर्षपछि अन्तर्राष्ट्रिय विमानस्थल पाएका छन् । २०७४ सालमा तत्कालीन पर्यटनमन्त्री रवीन्द्र अधिकारीले यो विमास्थल गण्डकी प्रदेशकाे सपना रहेको बताएका थिए ।
नेपालमा तेस्रो अन्तर्राष्ट्रिय विमानस्थल निर्माण भएर सञ्चालनमा आएको छ । यो एउटा विकासको उपलब्धि भएको पोखरा अन्तर्राष्ट्रिय विमानस्थलका निर्देशक विक्रम गौतम बताउँछन् ।
विमानस्थल बनाएर सञ्चालनमा ल्याउन लामो समय कुर्नुपरेको उनले बताए । विमानस्थल सञ्चालनमा आएसँगै नेपालको पर्यटन र उड्डयन क्षेत्रमा नयाँ आयाम थपिएको उनको भनाइ छ ।
विमानस्थल निर्माणका लागि चीनको एक्जिम बैंकले २ प्रतिशत ब्याजदरमा ऋण दिएको छ । एक्जिम बैंकले दिएको रकम मध्ये २५ प्रतिशत अनुदान हो भने ७५ प्रतिशतमा २ प्रतिशत ब्याज लाग्छ । २ हजार ५०० मिटर रनवे भएको पोखरा विमानस्थलमा एयर बस ३२० उडान र अवतरण हुन सक्छ ।
प्राधिकरणले पोखरा अन्तर्राष्ट्रिय विमानस्थलबाट उद्घाटनकै दिन अन्तर्राष्ट्रिय उडान हुने बताउँदै आए पनि अन्ततः उडान भने नहुने भएको छ ।
अन्तर्राष्ट्रिय विमानस्थल उद्घाटनको खुसियालीमा पोखरा महानगरपालिकाले आइतबार सार्वजनिक बिदासमेत दिएको छ । चीनको सिएएमसी इन्जिनियरिङ कम्पनीले ११ अगस्ट, २०१७ देखि विमानस्थल निर्माण सुरु गरेको थियो ।
