काठमाडौँ– प्रधानमन्त्री पुष्पकमल दाहाल ‘प्रचण्ड’ले गत साता विदेशबाट ल्याइएका मोबाइलमा तत्काल कडाइ नगर्न निर्देशन दिएका थिए । आफ्नो निर्देशन पालन नभएपछि उनले अर्थ मन्त्रालयसँग आपत्ति जनाएका छन् ।
प्रधानमन्त्रीले मंगलबार बिहान टेलिफोनमार्फत उपप्रधानमन्त्रीसमेत रहेका अर्थमन्त्री विष्णु पौडेललाई उक्त निर्णय कार्यान्वयन नभएकोप्रति चासो राखेका थिए ।
सोमबार अमेरिकाबाट फर्केका झापाका दुधलाल नेम्वाङले आफ्नो साथमा ल्याइएको आइफोनमा एयरपोर्टका कर्मचारीले १८ प्रतिशत कर लिएपछि आफ्नो सामान त्यहीँ छाडेर गएको सूचना प्रधानमन्त्री निवास बालुवाटारमा पुगेको थियो ।
त्यही सूचनाका आधारमा प्रधानमन्त्रीले अर्थमन्त्री पौडेललाई फोनमार्फत तत्काल कार्यान्वयन मिलाउन निर्देशन दिएका हुन् ।
अर्थमन्त्रालय स्रोतका अनुसार मंगलबार बिहान अर्थमन्त्री पौडेल र अर्थसचिवलाई आवश्यक कानुनी प्रक्रिया पछि मिलाउँदै जान सकिने तर आफ्नाे निर्देशन आजकै मितिदेखि कार्यान्वयन गराउन प्रधानमन्त्रीले निर्देशन दिएका हुन् ।
अर्थ मन्त्रालयले भने विमानस्थल घटनाको विषयमा अनुसन्धान गरिरहेको जनाएको छ ।
