मनिला– फिलिपिन्समा गत साता ५१ जनाको ज्यान गएको बाढीका कारण विस्थापित भएका ३३ हजार भन्दा बढी मानिस अझै पनि अस्थायी आश्रयस्थलमा रहेका छन् ।
समाज कल्याण तथा विकास विभागले क्रिसमसको पूर्वसन्ध्यामा बाढीबाट गम्भीर रूपमा प्रभावित पाँच क्षेत्रका ८ हजार ९३० परिवारलाई उद्धार गरेको जनाएको छ ।
राष्ट्रिय प्रकोप जोखिम न्यूनीकरण तथा व्यवस्थापन परिषद्ले मङ्गलबारको अद्यावधिक प्रतिवेदनमा मृतकको सङ्ख्या ५१ पुगेको र थप १९ बेपत्ताको खोजी भइरहेको जनाएको छ ।
बाढीले दक्षिणपूर्वी एसियाली देशका १० क्षेत्रका करिब छ लाख मानिसहरूलाई सुरक्षित स्थानमा सार्न बाध्य तुल्याएको थियो । स्थानीय रिपोर्टका अनुसार दक्षिणी फिलिपिन्सको लानाओ डेल नोर्टे प्रान्तमा आफ्ना काका र काकीसँग सवार मोटरसाइकललाई अचानक बाढीले बगाउँदा आठ वर्षीया बालिकाको मृत्यु भएको थियो ।
लानाओ डेल नोर्टे सूचना अधिकारी जोइला म्याक्सिन एसिकले बालिकाको डुबेर मृत्यु भएको र यस प्रान्तका झण्डै छ हजार बासिन्दा बाढीबाट प्रभावित भएको बताइन्।
फिलिपिन्स विश्वव्यापी रूपमा सबैभन्दा प्रकोपबाट प्रभावित हुने देशहरू मध्ये एक हो । यहाँ औसतमा वार्षिक २० भन्दा बढी टाइफुनहरू आउँने गर्दछ तीमध्ये केही अत्यन्त तीव्र गतिमा आउँने हुनाले विनाशकारी पनि हुन्छन्। –रासस सिन्ह्वा
