काठमाडौँ– विदशी खेलाडीहरू अनुमति नै नलिई नेपाल आउने गरेको पाइएको छ ।
नेपालमा खेलाडी भित्र्याउँदै आएका विभिन्न क्लब र राष्ट्रिय खेलकुद परिषद्ले समेत स्वीकृतिबिना खेलाडी ल्याउने गरेको श्रम तथा व्यवसायजन्य सुरक्षा विभागले जनाएको छ ।
अहिले टियु क्रिकेट मैदानमा नेपाल टी–२० क्रिकेट लिग जारी छ । नेपाल टी–२० लिगमा सट्टेबाजदेखि, म्याच फिक्सिङ र आर्थिक चलखेल भइरहेको नेपाल क्रिकेट संघ (क्यान)ले आरोप खेपिरहेको छ ।
क्यानले भारतीय कम्पनी सेभेन थ्री स्पोर्टस्लाई नेपाल टी–२० लिग बेच्नु नै गलत भएको भन्दै स्वयं खेलाडीहरूले नै विरोध गरिरहेका छन् । जसका कारण अहिले नेपाल टी–२० लिग विवादमात्रै होइन, शंकाको घेरामा परेको छ ।
अहिले भइरहेको लिगमा म्याच फिक्सिङ र आर्थिक चलखेल भएको आरोप क्यानलाई लागेको छ । तर, क्यानले भने म्याच फिक्सिङ र आर्थिक चलखेलको हल्लामात्र भएको भन्दै आफ्नो बचाउ गरिरहेको छ ।
नेपाल टी–२० लिगमा विदेशी खेलाडीसमेत सामेल छन् । उनीहरूले नेपालमा खेल्न आउँदा स्वीकृति लिएका छन् कि छैनन् भन्ने प्रश्न उठेको हो ।
अख्तियार दुरुपयोग अनुसन्धान आयोगले नेपाल टी–२० लिगमाथि छानबिन सुरु गरेको छ । अख्तियारले राष्ट्रिय खेलकुद परिषद्लाई पत्र पठाउँदै ७ दिनभित्र आवश्यक कागजातसहितको प्रतिक्रिया पठाउन भनेको छ ।
यही विषयसँग जोडेर खेलाडी कसरी नेपाल भित्रिन्छन् भन्ने पनि आमचासोको विषय बनेको छ ।
विदेशी खेलाडीको जानकारी हुँदैन : विभाग
नेपाल आउने विदेशी खलाडीको श्रम स्वीकृति भए/नभएको कुरा त परै जाओस्, उनीहरू नेपाल आएको सूचनासम्म पनि श्रम तथा व्यवसायजन्य सुरक्षा विभागमा नपुगेको पाइएको हो ।
नेपाल भित्रिनुअघि विदेशी खेलाडीले श्रम स्वीकृति लिनुपर्ने र त्यसको सूचना दिनुपर्ने व्यवस्था श्रम ऐनमा छ । तर, म्याच खेल्न आउने विदेशी खेलाडीले जानकारीसमेत नगराउने गरेको विभागका महानिर्देशक कृष्णप्रसाद ज्ञवालीले जानकारी दिए ।
‘अस्ति टी–२० लिगमा समस्या र विरोध भएपछि राखेपाका कर्मचारी विदेशी खेलाडीको श्रम स्वीकृतिका बारेमा बुझ्न आएका थिए,’ उनले भने, ‘औपचारिक कागजात नल्याएका कारण हामीले सबै प्रक्रिया पुर्याएर आउन आग्रह गरेका थियौँ । अहिलेसम्म खेलाडीकै नाममा भनेर श्रम स्वीकृति लिएको प्रमाण छैन । हामीले सबै प्रमाण विभागको साइट राखेका छाँै ।’
महानिर्देशक ज्ञवालीले भनेजस्तै विभागको साइटमा खेलाडीका नाममा श्रम स्वीकृति भएको प्रमाण छैन । कतिपय खेलाडी भारतको बाटो हुँदै भित्रिने भएका कारण अध्यागमन अनुमतिसमेत नहुने गरेको विभागले जनाएको छ ।
विदेशी खेलाडीले श्रम स्वीकृति नलिएको विषयमा राखेप भने जबाफविहीन छ । खेलाडीको प्रमाण भएका कारण अहिलेसम्म श्रम स्वीकृति लिएको प्रमाण नखोजेको राखेपका सूचना अधिकारी खुसराज दाहालल जानकारी दिए ।
राखेपले अहिले खेलाडीको भिसा र आगमन स्वीकृृतिका विषयमा छलफल गरिरहेको उनले बताए ।
१० वर्षयता नेपालमा २२२ जनाभन्दा धेरै खेलाडी खेल खेल्नकै लागि आएको राखेपको अनुमान छ । नेपालमा भारत, बंगलादेश, अफ्रिकी देश र युरोपका केही खेलाडी आउने गरेको राखेपले जनाएको छ ।
नेपाल आउने विदेशी खेलाडीले ९० दिनको भिसा पाउँछन् । यसरी आउने खेलाडीले श्रम स्वीकृति लिनुपर्ने हुन्छ । उनीहरूले ३ महिनाभन्दा धेरै बस्नुपरेको अवस्थामा सम्बन्धित क्लब र खेलाडी स्वयंले नेपालको अध्यागमन विभागमा जानकारी गराउनुपर्ने कानुनी व्यवस्था भएको श्रम विभागले जनाएको छ ।
तर, नेपालको कानुनअनुुसार आउने र जाने कुनै पनि विदेशी खेलाडीले नियम पालना नगरेको विभागले जनाएको छ ।
नेपालमा भित्रिएका खेलाडीले अध्यागमन र विभागमा कानुनअनुसार श्रम स्वीकृतिको जानकारी नगराउँदा उनीहरू समस्यामा पर्दा कानुनी उपचार खोज्न समस्या हुने विभागका महानिर्देशक ज्ञवाली बताउँछन् ।
खेलाडीलाई समस्या पर्दासमेत सरकारले सुरक्षा दिनुपर्छ । तर, श्रम स्वीकृति नभएका कारण जतिसुकै चर्चित खेलाडी भए पनि समस्या पर्दा कानुनी उपचारको बाटो नहुने विभागले जनाएको छ ।
