काठमाडौँ –नेकपा एमालेका अध्यक्ष केपी शर्मा ओलीले अहिले देशी विदेशी शक्तिहरूले नचाहेको सरकार बनेको दाबी गरेका छन् । उनले नेपाली कांग्रेसका सभापति शेरबहादुर देउवाले राप्रपाका अध्यक्ष राजेन्द्र लिङ्देनलाई प्रधानमन्त्रीको प्रस्ताव गर्दा संविधानको धारा बिर्सिएको टिप्पणी गरेका छन् ।

‘जसले गठबन्धनका साथीहरूलाई प्रधानमन्त्रीको प्रस्ताव गरे, उनीहरुले संविधानको कुरै भुलेछन्’, उनले टिप्पणी गदै भने, ‘तर प्रधानमन्त्री प्रस्ताव गर्नेलाई ‘तपाईंले मलाई कुन धाराअन्तर्गत प्रधानमन्त्री बनाउनुहुन्छ?’ भन्दा ए त्यो चाहिँ मिलेनछ भनेछन् ।’

आइतबार धुलिखेलमा आयोजित जनसङ्गठन सुदृढीकरण कार्यशाला बैठकको उद्घाटन गर्दै पूर्वप्रधानमन्त्री समेत रहेका अध्यक्ष ओलीले प्रधानमन्त्री पुष्पकमल दाहाल प्रचण्डले विश्वासको मत पाउने पनि बताए ।

‘२६ पुसमा विश्वासको मत ढाल्न खोज्नेहरू यो सरकारले विश्वासको मत पाउँछ । यो एमालेले बनाएको सरकार हो,’ उनले भने, ‘सरकारविरूद्ध अनेक प्रयास भएका छन् । हामीले प्रधानमन्त्रीलाई विश्वासको मत दिन्छौँ । सरकार पनि टिक्छ ।’

अध्यक्ष ओलीले असंवैधानिक र अनैतिक ढंगले अदालतले बनाइदिएको परमादेशी गठबन्धनलाई परास्त गरेर नयाँ जनादेश बमोजिम सरकार बनाउने गरेको बाचा पूरा गरेको बताए । 

सरकार गिराउने कांग्रेसको अहिलेको प्रयास व्यर्थै जाने पनि बताए । 

‘अहिलेको गठबन्धनका कतिपय नेतालाई प्रधानमन्त्री दिउँला भनेर फकाइरहेका रहेका छन्’, ओलीले भने, ‘अहिलेको सरकार संविधानको धारा ७६ (२) अनुसार बनेको छ । यो सरकारले पुस २६ मा बहुमत ल्याउन सकेन भने नयाँ सरकार निर्माण संविधानको धारा ७६ उपधारा ३ मा जान्छ ।’

गठबन्धन फुटाउन प्रधानमन्त्री दिने आश्वासन फेल खाएपछि कांग्रेसले नयाँ कार्ड खेलिरहेको उनको भनाइ छ । ‘प्रधानमन्त्री दिने कुरा संविधानअनुसार पनि नमिलेपछि फेरि उपप्रधानमन्त्री र सभामुख दिउँला भनेर फकाएछन्’, उनले भने ।