काठमाडौँ– चलचित्र कलाकार संघको अध्यक्ष पदमा अभिनेत्री रेजिना उप्रेतीले उम्मेदवारी दिने घोषणा गरेकी छन् । उप्रेतीले सामाजिक सञ्जाल फेसबुकमार्फत संघको अध्यक्ष पदमा उम्मेदवारी दिने घोषणा गरेकी हुन् ।
चैत ४ गते संघको महाधिवेशन हुँदै छ । आफू निर्वाचित भए संघलाई क्रियाशील र रचनात्मक बनाउने उनले दाबी गरेकी छन् ।
चलचित्र क्षेत्रमा आफू २४ वर्षदेखि निरन्तर संघको सदस्य रहेको, आजीवन सदस्य हुँदै केन्द्रीय उपाध्यक्ष र वरिष्ठ उपाध्यक्ष भइसकेकाले अध्यक्ष पदका लागि आफू योग्य रहेको उनको तर्क छ ।
अभिनेत्री उप्रेतीले अध्यक्षको जिम्मेवारी पाएपछि व्यक्तिगत स्वार्थभन्दा माथि उठेर संस्थाको प्रगतिको लाग्ने बताएकी छन् ।
करिब ४५ वटा चलचित्रमा अभिनय गरेकी अभिनेत्री उप्रेतीले ‘इतिहास’ चलचित्रबाट अभिनय करिअर थालेकी थिइन् । उनको पछिल्लो चलचित्र ‘भाग्यले जुरायो’ २ वर्षअघि सार्वजनिक भएको थियो ।
यसैबीच, कलाकार संघको आगामी महाधिवेशनमा अभिनेता सविन श्रेष्ठले समेत अध्यक्ष पदमा उम्मेदवारी दिने घोषणा गरेका छन् ।
