रुपन्देही–रुपन्देहीको देवदहमा छैठौं म्याराथन दौड प्रतियोगिता हुने भएको छ । लियो क्लब अफ लर्ड बुद्ध देवदहको आयोजनामा देवदहमा म्याराथन दौड प्रतियोगिता हुन लागेको हो ।
पत्रकार भेटघाटको आयोजना गर्दै प्रतियोगिताको विषयमा जानकारी गराइएको हो । लियो क्लब अफ लर्ड बुद्धका अध्यक्ष राहुल देव सापकोटाले देवदहका पर्यटकीय, ऐतिहासिक र धार्मिक क्षेत्रको प्रचार–प्रसार, युवाहरुलाई खेलकुद सँगै सामाजिक उत्तरदायित्व बोध गराउंदै सामाजिक संघ संस्थामा आबद्ध गराउनुका साथै खेलकुद क्षेत्रको विकास गर्ने उद्देश्यले प्रतियोगिता आयोजना गरिएको बताए ।
देवदहको बुद्धचोक सुरुवात बिन्दु रहेको म्याराथन प्रतियोगितामा देवदहको ऐतिहासिक, पर्यटकीय र धार्मिक स्थल भवानीपुर, पाकारी, बैरीमाइ, कन्यामाइ, मायादेवी एसोधारा लगायत पार्क समेटी १६ किलोमिटरको दुरी तय गरिएको म्याराथन प्रतियोगिता संयोजक बिबेक जंग कार्कीले बताए ।
प्रतियोगितामा प्रथम हुने महिला तथा पुरुष धावकले जनही २५/२५ हजार, द्वितीयले जनही १५/१५ हजार र तृतीय हुनेले जनही १०/१० हजार नगद पुरस्कार प्राप्त गर्नेछन ।
