काठमाडौँ–नेपाल टी–२० लिगको दोस्रो क्वालिफायरमा जनकपुर रोयल्सलाई ३९ रनले पराजित गर्दै विराटनगर सुपर किङ्ग्स फाइनलमा पुगेको छ । त्रिवि क्रिकेट मैदानमा मंगलबार टस जितेर ब्याटिङ थालेको विराटगरले चार विकेटको क्षतिमा एक सय ६७ रनको योगफल तयार गरेको थियो ।
जवाफी ब्याटिङमा उत्रिएको जनकपुरले १९.१ ओभरमा सबै विकेट गुमाएर एक सय २८ रन मात्रै बनाउन सक्यो ।
जनकपुरको टिम नआइपुग्दा समयमा टस हुन सकेको थिएन । दिउँसो १२ः०० बजे सुरु हुने तय भएको खेल करिब आधा घण्टा ढिलो सुरु भएको थियो ।
समूह चरणबाट दोस्रो स्थानमा रहँदै प्ले अफमा पुगेको जनकपुर पहिलो क्वालिफायरमा लुम्बिनी अल स्टार्ससँग पराजित भएको थियो ।
विराटनगर इलिमिनेटरमा काठमाडौं नाइट्सलाई पराजित गर्दै दोस्रो क्वालिफायरमा आइपुगेको हो । फार वेस्टर्न युनाइटेड र पोखरा समूह चरणबाटै बाहिरिइसकेका छन् । फाइनलमा पुगेको विराटनगरले बुधबार उपाधिका लागि लुम्बिनीसँग खेल्ने छ ।
