काठमाडौँ –एभरेष्ट भलिबल क्लबले बुधबार नयाँ बजार सामाजिक युवा क्लबलाई सोझो सेटमा हराउँदै एनभीए महिला भलिबल लिगमा स्थान बनाउन सफल भएको छ ।
त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा जारी सातौँ राष्ट्रिय एनभीए महिला क्लब भलिबल च्याम्पियनसिपमा बुधबार सम्पन्न महिलातर्फको पहिलो खेलमा एभरेष्टले नयाँ बजारमाथि ३–० को सेटमा हराएको हो ।
समूहमा अन्तिम खेलमा सान्त्वना जित निकाल्नेक्रमा एभरेष्टले नयाँ बजारलाई २५–१२, २५–१२, २५–१४ को स्कोरमा विजय हासिल गरेको हो । जितसँगै समूहमा तेस्रो भएको एभरेष्टले एनभीए महिला भलिबल लिगमा स्थान बनाउन सफल भएको छ ।
यस प्रतियोगितबाट महिलाको ६ र पुरुषको ८ टिमले एनभीए महिला भलिबल लिगमा स्थान बनाउनेछन् । यस समूहबाट यसअघि नै नेपाल पुलिस र न्यु डायमण्ड स्पोर्ट्स क्लबले यस प्रतियोगिताको सेमिफाइनल र लिगका लागि स्थान पक्का गरिसकेका छन् । तथापी नेपाल पुलिस र न्यु डायमण्डबीचको नतिजाले समूह विजेता र उपविजेताको टुंगो लाग्नेछ ।
बुधबार नै सम्पन्न दोस्रो खेलमा त्रिभुवन आर्मीले गण्डकी प्रदेशलाई ३–० ले हरायो । राखेप कभर्ड हलमै सम्पन्न खेलमा त्रिभुवन आर्मीले २५–११, २५–१०, २५–१५ को को स्कोरमा सहज जित निकालेको हो । यसअघि आर्मीले कृष्ण सेकेण्डरी ऐकेडेमीलाई पनि ३–० ले हराएको थियो ।
गण्डकी यसअघि सशस्त्र प्रहरी बल (एपीएफ)सँग ३–० को सेटमै पराजित भएको थियो । लगातार दोस्रो जितसँगै त्रिभुवन आर्मी ६ अंकका साथ शीर्ष स्थानमा छ । तीन अंक जोडेको एपीएफ दोस्रो स्थानमा छ । गण्डकी भने अंकविहीन छ ।
