काठमाडौं– चलचित्र विकास बोर्डका अध्यक्ष भुवन केसीले आफुलाई विभिन्न मुद्धा हालेर काम गर्न नदिइएको गुनासो गरेका छन् । बोर्डको अध्यक्ष भएर आएको ५/६ महिना मात्रै भएको भन्दै उनले मुद्धा हालेर काममा बाँझो हाल्न खोजेको बताए ।
शुक्रवार काठमाडौंमा भएको चलचित्र निर्माताहरुको वृहत भेला तथा छलफल अन्तरक्रिया कार्यक्रममा बोल्दै उनले यस्तो बताएका हुन । चलचित्र सुटिङका क्रममा नै भिडियो खिचेर सार्वजनिक गर्ने क्रम बढिरहेको भन्दै त्यस्ता क्रियाकलाप गर्नेलाई जरिवाना र फिल्ममा हुने क्षति तिराउने गरी कानून निर्माण गर्न लागिएको बताएका छन् ।
उनले पछिल्लो समय नेपाली फिल्म बनाउन धेरै नै गाह्रो भइरहेको बताए । उनले चलचित्र निर्माणका लागि स्टुडियो, प्रहरीको भ्यान लगायतका स्वीकृति लिन नै झन्झट ब्यहोर्नुपरेको बताए । उनले नेपाली निर्माताहरु फिल्म निर्माणका लागि घरखेत बेचेर लाग्ने गरेको तर युट्युब पत्रकारहरुले सिनेमाको दृश्य पहिल्यै खिचेर सार्वजनिक गरिदिँदा निर्माताहरुलाई ठूलो क्षति भइरहेको बताए ।
उनले कुनै पनि व्यक्तिले अमर्यादित क्रियाकलाप गरेको खण्डमा कडा सजाय दिने मात्र नभइ जरिवाना र फिल्ममा परेको क्षतिपूर्ति तिराउन सरकारसँग माग गरिएको बताए ।
उनले भने, ‘नेपाली फिल्म बनाउन धेरै गाह्रो भइरहेको छ । कुनैबेला स्टुडियो हुँदैन, प्रहरीको भ्यान चाहिन्छ, त्यो स्वीकृति लिँदालिँदै सात दिन लाग्छ । सुटिङ अहिले ड्रोन नभइ हुँदै हुँदैन, त्यो अनुमति लिन जाँदा ४ ठाउँ पुग्नुपर्छ । यो समस्या छ । साथै सबैभन्दा ठूलो समस्या नेपाली निर्माताहरुलाई एउटा निर्माताले घरखेत बेचेर सुटिङ गरिरहेको हुन्छ, क्यामेरा ल्याएर खिचेर त्यो युट्युबमा हालिदिन्छ । सुटिङको दृश्य आउट । हल भित्र गएर सिनेमा हेर्छ, सिनहरु हाल्दिहाल्छ । यसले हामीलाई ठूलो मर्का परेको छ । यदि कुनैपनि व्यक्तिले यस्तो क्रियाकलाप गर्छ भने त्यसलाई कडा भन्दा कडा सजाय मात्रै होइन, जरिवाना र क्षति पनि तिराउनुपर्छ भनेर माग राखेका छौँ ।’
