काठमाडौँ –कान्ति बाल अस्पतालले इन्डोस्कोपी सेवा पुनः सुरु गरेको छ । २ वर्षदेखि जनशक्ति अभावले बन्द सेवा पुनः प्रदान गर्न थालिएको हो ।
अस्पतालका कार्यकारी निर्देशक डा.युवानिधि बसौलाले १ महिनादेखि इन्डोस्कोपी सेवा प्रदान गर्न थालिएको जानकारी दिए । इन्डोस्कोपी मुखदेखि पेटसम्म समस्या पहिचान गर्नका लागि गरिन्छ । सरकारी अस्पताल कान्तिमा मात्र बालबालिकाको इन्डोस्कोपी सेवाको सुविधा रहेको छ । अस्पतालमा इन्डोस्कोपी नहुँदा बाहिर निजी अस्पतालमा बालबालिकालाई उपचारका लागि पठाउनुपर्ने बाध्यता रहेको थियो ।
‘हप्ताको १ दिन मङ्गलबार मात्र इन्डोस्कोपी गर्ने गरिएको छ’, डा.बसौलाले भने । अस्पतालले कोलोनोस्कोपी सेवासमेत सुरु गरेको छ । कोलोनोस्कोपीमा दिसा आउने भाग वा मलद्वारबाट पाइप छिराएर मलद्वारको भित्री अवस्था र ठूलो आन्द्राको अवस्था परीक्षण गरिन्छ । यस्तै अस्पतालले कलेजोको बायोस्पी सेवासमेत १ महिनादेखि सञ्चालन छ । बालबालिकामा कलेजोको समस्या हुने भएकाले १ महिनादेखि सेवा सुरु गरिएको कार्यकारी निर्देशक डा.बसौलाले जानकारी दिए ।
कलेजको मासु बढेको, कलेजोमा केही रोग देखिएमा बालबालिकामा कलेजोको बायोस्पी गर्ने गरिन्छ । ३३० शै्याको अस्पतालमा दैनिक ६०० भन्दाबढी बालबालिका उपचारका लागि आउने गरेका छन् । १ हजार शै्याको अति विशिष्टीकृत बाल अस्पताल बनाउने योजना रहेको अस्पतालले जनाएको छ ।
