२२ दिनपछि मन्त्रिपरिषद्ले पूर्णता पाउँदै, प्रचण्डका सारथी प्रायः सबै नयाँ अनुहार
.jpg)
काठमाडौँ– प्रधानमन्त्री पुष्पकमल दाहाल प्रचण्डले पदबहाली गरेको २२ दिनपछि मन्त्रिपरिषद्लाई पूर्णता दिन लागेका छन् ।
आज दिउँसो १ बजे राष्ट्रपति कार्यालय शीतल निवासमा नयाँ मन्त्रीहरूको शपथ ग्रहण कार्यक्रम तय भएको छ ।
माओवादी केन्द्रका अध्यक्ष पुष्पकमल दाहाल प्रचण्ड पुस १० मा प्रधानमन्त्री नियुक्त भएका थिए भने ११ गते राष्ट्रपतिसमक्ष शपथ लिएर पदबहाली गरेका थिए ।
त्यसदिन ७ जना मन्त्रिपरिषद् गठन गरेका प्रधानमन्त्री प्रचण्डले आज ३ राज्यमन्त्रीसहित १२ मन्त्री नियुक्त गरी पदबहाली गराउँदै छन् ।
संघीय सरकारमा प्रधानमन्त्रीसहित बढीमा २५ सदस्यीय मन्त्रिपरिषद् हुने संवैधानिक व्यवस्था छ ।
मन्त्रिपरिषद्मा सहभागी गराउन दलहरूले मन्त्रीको नाम प्रधानमन्त्रीलाई उपलब्ध गराइसकेका छन् । मन्त्रिपरिषद्मा सहभागी हुने मन्त्रीमध्ये सबैजसो युवा र नयाँ अनुहार देखिएको छ ।
नेकपा एमालेले विमला राई पौडेलललाई परराष्ट्र मन्त्री बनाउने भएको छ । त्यसैगरी पदम गिरीले स्वास्थ्य मन्त्रीको जिम्मेवारी पाउने भएका छन् । एमालेबाट मन्त्री सिफारिस भएका भगवती चौधरी महिला, बालबालिका तथा ज्येष्ठ नागरिक र हरि उप्रेतीलाई रक्षा मन्त्रालयको जिम्मेवारी दिने टुंगो भएको छ ।
त्यसैगरी, माओवादी केन्द्रबाट रेखा शर्मालाई सञ्चार तथा सूचना प्रविधि मन्त्री बनाउन लागिएको छ । संस्कृति, पर्यटन तथा नागरिक उड्डयन मन्त्रालयको जिम्मेवारी पाउन लागेका सूदन किराँती पनि मन्त्रिपरिषद्मा नयाँ अनुसार हुन् ।
त्यसैगरी, माओवादीका युवा नेता अमनलाल मोदी पनि महत्वपूर्ण जिम्मेवारीसहित पहिलो पटक सिंहदरबार प्रवेश गर्न लागेका हुन् ।
माओवादी केन्द्रले सुशीला श्रीपालीलाई संस्कृति, पर्यटन तथा नागरिक उड्डयन राज्यमन्त्री बनाउने भएको छ ।
राष्ट्रिय स्वतन्त्र पार्टीले डोलप्रसाद अर्याललाई श्रममन्त्री बनाउने भएको छ । त्यसैगरी, शिशिर खनाल शिक्षा मन्त्री र तोसिमा कार्कीले स्वास्थ्य तथा जनसंख्या राज्यमन्त्रीको जिम्मेवारी पाउने भएका छन् । उनीहरू सबैका लागि सिंहदरबार यात्रा पहिलो अनुभव हो ।
त्यसैगरी, राष्ट्रिय प्रजातन्त्र पार्टीबाट अध्यक्ष राजेन्द्र लिङ्देन नै मन्त्री हुने भएका छन् । उनले ऊर्जा मन्त्रालयको जिम्मेवारी पाउने बताइएको छ ।
त्यसबाहेक ध्रुबहादुर प्रधान कानुन मन्त्री र विक्रम पाण्डे सहरी विकास मन्त्री बन्ने भएका छन् ।
