काठमाडौँ –कर्णाली प्रदेशलाई १० विकेटले पराजित गरेर प्रदेश १ प्रधानमन्त्री कप महिला राष्ट्रिय टी–२० क्रिकेट प्रतियोगिताको सेमिफाइनलमा प्रवेश गरेको छ ।
समूह ‘बी’मा रहेको प्रदेश १ शतप्रतिशत जितका साथ समूह विजेता बन्दै सेमिफाइनलमा पुगेको हो । कर्णाली भने प्रतियोगितामा जितविहीन हुँदै बाहिरिएको छ ।
यो समूहबाट लुम्बिनी र मधेशबीचको विजेता समूह उपविजेताका रुपमा सेमिफाइनल प्रवेश गर्नेछ । यो खेल बुधबार हुनेछ ।
समूह ‘ए’ बाट एपीएफ र सुदूरपश्चिम यसअघि नै सेमिफाइनलमा पुगिसकेका छन् । समूहको विजेता छुट्टयाउन यी २ टिमबीचको खेल मंगलबारै हुँदैछ ।
इटहरीको जनता क्रिकेट मैदानमा खराव मौसमका कारण ११ ओभरमा छोट्याइएको खेलमा प्रदेश १ ले ४० रनको लक्ष्य पाएको थियो । प्रदेश १ ले ४.५ ओभरमै बिना क्षति विजय भेट्टाएको हो ।त्यसअघि टस जितेर ब्याटिङ गरेको कर्णालीले निर्धारित ११ ओभरमा ५ विकेट गुमाएर ३९ रनको योगफल बनाएको थियो ।
