काठमाडौँ–त्रिभुवन अन्तर्राष्ट्रिय विमानस्थलबाट २१ जना युवा पक्राउ परेका छन् । उनीहरू दुबई हुँदै क्रोएसिया जान लागेका थिए ।
उनीहरूलाई युरो बोकाएर पठाउन खोजेको आरोपमा त्रिभुवन विमानस्थलबाहिरबाट पदमबहादुर विश्वकर्मा पक्राउ परेका छन् । उनको साथबाट १ लाख २० हजार नेपाली रुपैयाँ बरामद भएको प्रहरीले जनाएको छ ।
फ्लाई दुबईको विमानमार्फत उनीहरू मङ्गलबार क्रोएसिया जान लाग्दा ह्यान्ड ब्याग चेकिङ एरियामा भएको स्क्रिनिङमा अवैध रकम फेला परेको प्रहरीले जनाएको छ । उनीहरू जनशक्ति इन्टरनेशनल सर्भिस प्रालि बसुन्धराबाट क्रोयसियाका लागि हिँडेका थिए । उनीहरू वर्किङ भिसामा त्यहाँ जान लागेको बताइएको छ ।
उनीहरूको साथबाट बरामद भएको युरो स्वीकृति नलिइकन लगेको पाइएपछि प्रहरीले सोधपुछ गर्दा विश्वकर्माले पठाएको बताएको त्रिभुवन अन्तर्राष्ट्रिय विमानस्थल प्रहरीले जनाएको छ ।
२१ जनाको साथबाट ५१ हजार ३५० युरो बरामद भएको छ । उनीहरूलाई आवश्यक अनुसन्धानका लागि राजस्व अनुसन्धान विभाग हरिहरभवन पठाइएको छ । क्रोएसिया जान लागेका सबै पुरुषहरु हुन् ।
प्रहरीका अनुसार पक्राउ परेका विश्वकर्मा म्यानपावर व्यवसायी हुन् । उनैले ती २१ जनालाई क्रोएसियाको एक कम्पनीका लागि रोजगारीमा पठाउन लागेका थिए ।
