काठमाडौं– त्रिभुवन अन्तराष्ट्रिय विमानस्थलको नयाँ टर्मिनल भवनको आगमनतर्फ राखिएको विद्युतीय भर्याङ असजिलो र अस्वभाविक भएको भन्दै यात्रुले गुनासो गर्ने गरेका छन् ।
सो भर्याङ असजिलो भएको र आफू दर्घटनामा परेको भन्दै नायिका उषा रजकले पनि सार्वजनिक रुपमा आवाज उठाएकी छन् । रजकले त आफू सो भर्याङमा दुर्घटनामा नै परेको पनि बताएकी छन् ।
नायिका रजकले एक भिडियो सामाजिक सञ्जालमा राख्दै सो भर्याङमा असजिलोपन देखाएका साथै सो भर्याङमा भएको दुर्घटना समेत देखाएकी छन् । उनी पनि सोही दुर्घटनामा परेकी थिइन् । उनको भिडियोमा धेरै यात्रुहरु रुदै र चिच्चाउदै उनीसँगै लडेको दृश्य देख्न सकिन्छ । रजकले लिफ्टको डिजाइन गलत भएको दाबी पनि गरेकी छन् । र, लिफ्ट बनाउदा भ्रष्टाचार भएको उनको आरोप छ ।
यो विषय सामाजिक सञ्जालदेखि व्यापक बहसमा आएको छ । यही विषयमा प्रष्ट हुनको लागि हामीले नायिका रजकसँग खासमा सो दिन के भएको थियो भनेर सोधका छौं । उनले आफू विदेशबाट नेपाल फर्कदै गर्दा घटना घटेको र सो घटनामा आफू पनि परेको बताएकी छन् ।
‘अगाडिको मानिस एकजना ठोकिएर लड्नु भयो र हामी पालैपालो लड्यौं, मसँगै लिफ्टमा रहेको सानो बच्चा नराम्ररी थिचिएको थियो, लड्दा एकअर्काको सुटकेसले एकएर्कालाई थिचेको थियो,’ उनले भनिन् । सो समयमा बच्चदेखि जेष्ठ नागरिकसम्मले यात्रा गरिरहेको र सबैजना दुर्घटनामा परेको उनले बताइन् ।
‘त्यो लिफ्टमा बच्चादेखि बृद्ध उमेरसम्मका मानिस थिए, प्रायः सबैलाई चोटपटक लाग्यो र मेरो खुट्टामा पनि समस्या भएको छ, यो एकदम ठुलो समस्या हो,’ उनले क्यानडानेपालसँग भनिन् । त्यस लिफ्टको क्षमता कति हो भन्नेसम्म पनि जानकारी नदिइएको उनको भनाई छ । ‘ठाउँ खाली छ भनेर जति जनालाई पनि जान दिने ? यस्तो पनि हुन्छ ?’ नायिका रजकले प्रश्न गरिन् ।
विमानस्थलमा भएको नराम्रो काम र यात्रु असुरक्षा बारे आफूले प्रश्न उठाउँदा उल्टै आफैलाई लखेटिएको उनको आरोप छ । ‘धेरै जनाले सामाजिक सन्जालमा तँलाई हिँड्न आउदैन ? तँलाई लिफ्ट प्रयोग गर्न आएन भनेर मेरो आवाजलाई मजाक बनाएका छन्, सबैले भोग्नु परेको समस्याको बारेमा मैले आवाज उठाएकी मात्रै हूँ,’ रजकले भनिन् ।
आफू बैंककबाट नेपाल आउँदा सो घटना घटेको उनको भनाई छ । उनका अनुसार विमानस्थलका ३ वटै लिफ्टमा यात्रुहरुको कोचाकोच अवस्था थियो । लाखौँ संख्यामा यात्रु आउने हँदा लिफ्ट अपुग भएको उनले बताएकी छिन् ।
