काठमाडौँ –सरिता लामिछाने, सरोज खनाल, प्रभात पलको मुख्य भूमिका रहेको फिल्म ‘सरी मम’ प्रदर्शनमा आएको छ ।
नविन बोगटीको निर्देशन रहेको उक्त फिल्म बिहीबारबाट प्रदर्शनमा आएको हो । तर, राजधानीका ठूला मल्टिप्लेक्समा भने यो फिल्म लागेको छैन् ।
लागुऔषध दुव्र्यसनीको विषयलाई समेटिएको यस फिल्ममा लामिछाने, खनाल र पलबाहेक सबै नयाँ कलाकार छन् ।
फिल्ममा युवावर्ग कसरी कुलतमा फस्छन र त्यसबारे अभिभावक कसरी सचेत हुने भन्ने बुझाउन खोजिएको फिल्मका कार्यकारी निर्माता विनोद लामाले बताए । निर्माण पक्षले मल्टिप्लेक्समा फिल्म लगाउन खोजे पनि हल सञ्चालकहरूले भने हटाउन थालेको लामाले बताए ।
‘हामीले मल्टिप्लेक्समा फिल्म नलगाएको होइन । हल सञ्चालकहरूले नै हटाइदिन थालेका छन्’, लामाले भने ।
फिल्मले अहिलेसम्म एउटा मात्रै शो मल्टिफ्लेक्स्मा पाएको पनि लामाले बताए । ‘हामीलाई हलले नै अहसयोग गरेजस्तो लागेको छ । हलले फिल्मका पोस्टरहरू टाँस्न मानेको छैन । दुई वटा टिकटमा एउटा निःशुल्क दिँदा पनि दर्शक आएका छैनन्’, लामाले भने ।
चलचित्रले दुइटा टिकट किन्दा एउटा सित्तैमा दिइने अफर ल्याएको हो ।
चलचित्र हेर्ने दर्शकलाई विभिन्न अफर राखिएको छ । चलचित्र प्रदर्शनमा आउने हलहरूसँगको सहमतिमा उक्त योजना ल्याइएको हो ।
अर्का अफर चलचित्रको टिकटमा वसुन्धरामा रहेको चिरायु अस्पतालमा स्वास्थ्य परीक्षणमा ५० प्रतिशतसम्म छुट पनि राखिएको छ । छुटका लागि चलचित्रको टिकट अस्पताललाई देखाउनु पर्नेछ । निर्माण टिम र अस्पतालबीच यो पनि सम्झौता भएको हो ।
फिल्म हेरेका दर्शकले भने राम्रो भनेर प्रतिक्रिया दिएको लामाको दाबी छ ।
अहिले काठमाडौं उपत्यकामा मात्रै रिलिज गरेको फिल्म उपत्यका बाहिर पनि लैजाने योजना रहेको उनले बताए ।
लामाका अनुसार, फिल्म निर्माणमा करीब ४५ लाख रूपैयाँ लगानी भएको छ । तर, फिल्मले भने औसत व्यापार पनि गर्न सकेको छैन् ।
