सिरियाको दक्षिणी प्रान्तमा अलेपोमा रहेको एक आवासीय भवन भत्कँदा त्यसमा रहेका कम्तीमा १६ जनाको ज्यान गएको बताइएको छ ।
यहाँको एउटा ७ तल्ले भवन भत्किँदा ती मानिसको मृत्यु भएको बताइएको छ । त्यस दुर्घटनामा ५ जना बालबालिका पनि परेका छन् ।प्रहरीका अनुसार उक्त भवनमा ७ परिवार बसेका थिए ।
स्थानीय बासिन्दाले उक्त भवनमा ३५ जनाको बसोबास रहेको बताएका छन् । भवनका भग्नावशेषबाट १ जनालाई मात्र जीवित उद्धार गरिएको छ ।
प्रहरीले मृतकको सङ्ख्या अझै बढ्न सक्ने बताएको छ । यहाँको सरकारी समाचार समिति सानाले सो भवनको भग्नावशेषमा पुरिएको आशंकामा उद्धार जारी रहेको जनाएको छ ।
१ दशकभन्दा लामो समयदेखि जारी युद्धका कारण उत्तरी जिल्ला अफ्रिनबाट विस्थापित भएका सिरियाली नागरिक उक्त भवनमा बस्दै आएकाे सिरियाली गृह मन्त्रालयका अधिकारीले जनाएका छन् ।
सिरियामा जारी द्वन्द्वमा परी करिब ५ लाख नागरिकको ज्यान गइसकेको छ । अधिकांश विस्थापित सिरियाली यस्तै कमजोर प्रकृतिका भवनमा बस्दै आएका छन् ।
गएको सेप्टेम्बरमा पनि अलेप्पोनजिकको फर्दवासमा एक यस्तै कमजोर भवन भत्किँदा ३ जना बालबालिकासहित १० जनाको मृत्यु भएको गृह मन्त्रालयका अधिकारीले जनाएका थिए ।
