त्रिविमा स्नातक तह परीक्षाका लागि आवेदन दिने म्याद ७ दिन थप

काठमाडौँ – त्रिभुवन विश्वविद्यालयले स्नातक तह चौथो वर्षको परीक्षा फारम भर्ने म्याद थप गरेको छ ।  

स्नातक तह चौथो वर्षको परीक्षा तालिका अव्यवहारिक भएको भन्दै चौतर्फी विरोध भएपछि परीक्षा फारम भर्ने म्याद थप गरिएको हो ।

परीक्षा नियन्त्रण कार्यालय बल्खुले बुधबार सूचना जारी गरी परीक्षा फारम भर्ने म्याद ७ दिन थप गरेको हो । यसअघि म्याद माघ ७ गनेसम्म राखिएकोमा अब दोब्बर दस्तुरमा माघ १५ गतेसम्म आवेदन दिन सकिने कार्यालयले जनाएको छ । 

त्यस्तै, स्नातक पहिलो वर्षको परीक्षाका लागि पनि माघ २२ सम्म एकल दस्तुर र त्यसपछिको ७ दिन दोब्बर दस्तुरमा आवेदन दिन सकिने कार्यालयले जनाएको छ । 

त्रिविले गत पुस २९ गते आवेदन फारम खुला गरेर माघ ६ गते विज्ञान, व्यवस्थापन, मानविकी तथा शिक्षा संकाय स्नातक चौथो वर्षको परीक्षा तालिका सार्वजनिक गरेको थियो । तालिका अनुसार आगामी फागुन १० गतेदेखि परीक्षा सुरु हुने जनाइएको छ ।

परीक्षा फारम खुलेको न्यूनतम ३५ दिनभित्र मात्रै परीक्षा तालिका सार्वजनिक गर्नुपर्ने नियम विपरित त्रिविले मनोमानी निर्णय गरेको भन्दै विभिन्न विद्यार्थी संगठनहरुले तत्काल निर्णय सच्याउन चेतावनी दिँदै आएका थिए ।