धौलागिरि अस्पतालमा डायलासिस सेवाको क्षमता विस्तार

बागलुङ-  धौलागिरि अस्पताल बागलुङले डायलासिस सेवाको क्षमता थप गरेको छ । मिर्गौला पीडितलाई निःशुल्क रुपमा डायलासिस सेवा प्रदान गर्दै आएको र अस्पतालले क्षमता थप गरेको हो ।

डायलसिस प्रक्रियामा प्रयोग हुुने ‘आरो’ पानी उत्पादन गर्ने मेसिन थपिएपछि सेवा विस्तार गरिएको हो । आरोपानी पर्याप्त मात्रमा उत्पादन हुँदा डायलासिस सेवालाई ३ चरणमा विभाजन गरेर उपचार सेवा थप गरिएको धौलागिरि अस्पतालका नर्सिङ अधिकृत तथा सूचना अधिकारी अञ्जना पौडेलले जानकारी दिइन् ।

आरोपानीको अभाव हुँदा विगतमा दैनिक २ चरणमा मात्रै डायलासिस हुँदै आएको थियो । गत मङ्सिरदेखि दैनिक ३ चरणमा डायलासिस सेवा प्रदान गरिएको छ ।

आरोपानी २५० लिटर प्रतिघन्टा उत्पादन हुँदा २ चरण थियो । अहिले आरोपानी प्रतिघन्टा १ हजार लिटर उत्पादन हुन्छ । डायलासिस मेसिन थप गर्न सके थप बिरामीको पनि उपचार गर्न सकिने सूचना अधिकृत पौडेलको भनाइ छ ।

हाल अस्पतालमा ४४ जना मिर्गौलाका बिरामीले नियमित निःशुल्क डायलासिस सेवा लिँदै आएका छन् । तीबाहेक ५ जनाले उपचारका लागि पालो गर्नुपर्ने अवस्था छ । यद्यपि पालो कुर्नुपर्ने बिरामी जटिल प्रकृतिका छैनन् । उनीहरूले हप्ता वा १५ दिनमा १ पटक मात्रै डायलासिस गर्दै आएका छन् ।

नियमित सेवाका सूचीमा रहेका बिरामीमध्ये ३ जनाले हप्ताको ३ पटक अन्यले हप्ताको २ पटक डायलासिस गराउँछन् ।

६ वटा मेसिनबाट दैनिक डायलासिस गर्दै आएको सूचना अधिकृत पौडेलको भनाइ छ । एउटा मेसिनले बेलाबेलामा काम गर्दैन । ५ वटा मेसिन नियमित सञ्चालनमा छन् ।

गण्डकी प्रदेश सरकारसँग थप डायलासिस मेसिनको माग गरिएको छ । अझै ५/६ मेसिन सञ्चालन गर्न सक्ने आरोपानीको क्षमता रहेको उनले बताइन् ।

डायलासिसका लागि जिल्ला बाहिरका सरकारी तथा निजी अस्पतालमा रहेका बिरामीलाई जिल्लाबाटै सेवा दिन सकिने सूचना अधिकारी पौडेलले बताइन् ।

स्थानीय तहले पनि नागरिकको स्वास्थ्य सेवालाई ध्यानमा राखेर डायलसिस मेसिन खरिद गरिदिए सेवा उपलब्ध गराउन आफूहरु तयार रहेको पौडेल बताउँछिन् ।

धौलागिरि अस्पतालमा २०७५ साल वैशाख १० गतेदेखि २ बिरामीबाट निःशुल्क डायलासिस सेवा सञ्चालन गरिएको हाे ।

डायलासिसका लागि गाउँबाट आउनेलाई पहिलो चरण, सदरमुकामदेखि नजिकै रहेका बिरामीलाई दोस्रो चरण र सदरमुकाममै बसोबास गर्ने बिरामीलाई तेस्रो चरण अर्थात् साँझको समयमा डायलासिस सेवा उपलब्ध गराउने गरी कार्य सूची तयार गरिएको छ ।

१ बिरामीको एक पटक डायलासिस विद्युत् र डाइलाइजर बाहेकको करिब २ हजार ६७० रुपैयाँ खर्च आउँछ । सरकारले उक्त रकमको शाेधभर्ना गर्दै आएको छ ।

डायलासिस सेवामा ५ कर्मचारी कार्यरत छन् । उक्त जनशक्ति सेवा प्रवाहका लागि अपुग भएको अस्पतालका प्रशासकीय अधिकृत तेजप्रसाद निउरेले जानकारी दिए ।