राष्ट्रपति भण्डारी वसन्त श्रवण कार्यक्रममा सहभागी

काठमाडाैं-राष्ट्रपति विद्यादेवी भण्डारीले हनुमानढोका दरबारस्थित नासलचोक पुगेर बिहीवार वसन्त श्रवण गरेकी छिन् ।

राष्ट्रपतिले सरस्वती पूजाको अवसरमा वसन्त श्रवण गर्ने परम्परा छ । राजा प्रताप मल्लको पालादेखि राष्ट्रप्रमुखलाई वसन्त श्रवण गराउने परम्परा चल्दै आएको छ ।  

वसन्त श्रवण गर्न पुगेकी राष्ट्रपति भण्डारीलाई नेपाली सेनाको एक टुकडीले सलामी अर्पण गरेको थियो भने पञ्चेबाजाले स्वागत गरिएको थियो । 

वसन्त श्रवणपछि राष्ट्रपति भण्डारीले पुजारीबाट फूलमाला, टीका र प्रसाद ग्रहण गरेकी थिइन । 

वसन्त श्रवणको अवसरमा राष्ट्रपतिले विद्याकी देवी सरस्वतीको पूजा आराधना गरेकी छन् । 

वसन्त श्रवण समारोहमा राष्ट्रपति भण्डारीसहित उपराष्ट्रपति नन्दबहादुर पुन, प्रधानमन्त्री पुष्पकमल दाहाल, कायमुकायम प्रधानन्यायाधीश हरिकृष्ण कार्की, सभामुख देवराज घिमिरे र राष्ट्रिय सभाका अध्यक्ष गणेशप्रसाद तिमिल्सनाको उपस्थिति थियो । 

वसन्त पञ्चमीको दिनमा वसन्त श्रवण गरेमा मात्रै पनि सुख, शान्ति र समृद्धि प्राप्त हुने जनविश्वास छ । वसन्त पञ्चमीको दिनबाट वसन्त ऋतु शुरुवात भएको मानिन्छ ।