काठमाडौँ– नेपाल क्रिकेट संघ (क्यान) ले नेपाल टी–२० क्रिकेट लिगका लागि भारतीय कम्पनी सेभेन थ्री स्पोर्टससँग सम्झौता गर्नु गल्ती भएको स्वीकार गरेको छ ।
बिहीबार काठमाडौँमा पत्रकार सम्मेलन गर्दै क्यानले सेभेन थ्री स्पोर्टस्सँगको सम्झौतामा केही त्रुटि भएको स्वीकार गर्दै क्यानको कुनै गलत नियत नभएको समेत स्पष्ट पारेको छ ।
पत्रकार सम्मेलनमा क्यानका अध्यक्ष चतुरबहादुर चन्दले लामो अनुभवका आधारमा सेभेन थ्री स्पोर्टस्सँग सम्झौता गरेको तर सम्झौतापछि आवश्यक जिम्मेवारीबाट पछि हटेर सेभेन थ्री स्पोर्टस्ले धोका दिएको बताए ।
स्पट फिक्सिङ प्रकरणले लिग नै विवादमा परेको र यसको असर क्यान र समग्र नेपाली क्रिकेटमा परेकाले अब सवै मिलेर नेपाली क्रिकेटलाई पूर्ववत अवस्थामा फर्काउनुपर्ने उनले बताए ।
श्रम स्वीकृतिदेखि सुरु भएको लिगको विवादमा संघको पनि केही त्रुटि रहेको चन्दले स्वीकार गरे । उनले अहिले लिगमा खेल्ने अधिकांश खेलाडीले पारिश्रमिक पाइसकेको र केही खेलाडीले पनि छिट्टै पाउने दाबी गरे ।
उनले स्पट फिक्सिङ प्रकरणमा प्रहरीलाई क्यानको पूर्ण सहयोग हुने पन िबताए । लिग सुरु हुनुभन्दा पहिले नै सम्भावित फिक्सिङलगायत घटनालाई मध्यनजर गर्दै सिआइबीलाई पत्र लेखेर प्रतिनिधि पठाउन भनेको चन्दले जानकारी दिए ।
उनले फिक्सिङ तथा कुनै अनियमिततामा क्यानका कुनै पदाधिकारी संलग्न भए कारबाही भोग्न तयार रहेको बताए ।
यस्तै बलात्कारको आरोपमा निलम्बनमा परेका क्रिकेटर सन्दीप लामिछानेलाई टिममा फर्काउने बारेमा आफूहरू छलफलमा रहेको र विद्यमान कानुनअनुसार नै अघि बढ्ने बताए ।
प्रहरीको केन्द्रीय अनुसन्धान ब्युरो (सिआइबी) ले गरेको छानबिनमा नेपाल टी–२० लिगमा स्पट फिक्सिङ गरेको भन्दै २ क्रिकेटरलाई पक्राउ गरेको छ भने फिक्सिङमा संलग्न हुन सक्ने आशंकामा अन्य १० जनामाथि पनि अनुसन्धान गरिरहेको छ ।
