‘रक गार्डेन’ देखेर पर्यटक प्रफुल्लित

अर्घाखाँची –अर्घाखाँचीको सन्धिखर्क नगरपालिका–११ डिभर्नामा रहेको ‘रक गार्डेन’को प्रचार गर्नसके पर्यटकीयस्थलको रूपमा विकास हुने देखिएको छ । प्राकृतिक रूपमा रहेको चट्टान आफैँ बगैँचाजस्तै बनेर बसेको छ । एक पटक हेर्न जाने मानिस चट्टानको बनाबट र त्यहाँको वातावरण देखेर प्रफुल्लित हुन्छन् । चिसो वातावरण र छिटोछिटो परिवर्तन हुने मौसममा देखिने ढुङ्गाको बगैँचामा जाने मासिन आनन्दित हुने गरेका छन् । 

कलात्मक रूपमा मानिसले आफैँ सजाएर र योजनाअनुसार बनाएर राखेकोजस्तो देखिने ती चट्टान अनौठो प्रकृतिका छन् । सयौँ रोपनी क्षेत्रफलमा फैलिएको त्यस स्थानलाई पर्यटकीयस्थलको रूपमा विकास र प्रचार गर्न सन्धिखर्क नगरपालिकाले गुरु योजना बनाएर अगाडि बढ्न थालेको सन्धिखर्क नगपालिकाका प्रमुख प्रशासकीय अधिकृत खुमलाल भुसालले बताए । 

यस स्थलमा स्थानीय तथा आन्तरिक पर्यटक आउन थालेका छन् । पर्यटकको लागि शौचालय, ट्रस्ट तथा एउटा मन्दिर बनाइएको छ । प्राकृतिक रूपमा बनेको ढुङ्गाको बगैँचाको प्रचार र विकासमा ध्यान दिनसकेमा सन्धिखर्क नगरपालिकाको महत्वपूर्ण पर्यटकीयस्थलको रूपमा विकास गर्न सकिने सन्धिखर्क नगरपालिका–११ का वडाध्यक्ष चेतनारायण आचार्यले बताए । अहिले पनि जिल्लाभित्रका मानिस दैनिक रूपमा त्यहाँ घुम्न पुग्छन् । 

लुम्बिनी र सुपा देउराली मन्दिरमा आएका पर्यटकलाई सन्धिखर्क बजार हँुदै अर्घा भगवती मन्दिर र यो गार्डेनमा ल्याउन सके सन्धिखर्कमा चहलपहल बढ्ने छ । चहलपहल बढाउन योजनाका साथ आफूहरूले काम गरिरहेको नगर प्रमुख कृष्णप्रसाद श्रेष्ठले बताए । यहाँबाट सन्धिखर्क, भूमिकास्थान नगरपालिका, मालारानी, पाणिनी र छत्रदे गाउँपालिका मात्र होइन पाल्पा र प्युठानका केही भाग हेर्न सकिन्छ ।