विराटनगर– विराटनगरमा आयोजना हुने सिएनआई एक्स्पोमा घरेलु तथा साना उद्यमीका उत्पादनलाई प्रवद्र्धन गर्न अल्लोका कपडादेखि विभिन्न स्वादका अचारका ‘स्टल’ रहने भएका छन् ।
एक्स्पो यही माघ १९ गतेदेखि २८ गतेसम्म चल्ने र सो एक्स्पोको साझेदार संस्था नेपाल घरेलु तथा साना उद्योग महासंघ मोरङको समन्वयमा लघु, घरेलु, साना र कृषि उद्यमीका लागि मात्रै ७२ स्टल रहने जनाइएको छ ।
ताप्लेजुङको राडी, तेह्रथुमको ढाका, भोजपुरको खुकुरी, विभिन्न जिल्लामा निर्मित हस्तकलाका सामान, घरेलु सामग्रीबाट निर्मित जुत्ता–चप्पल, ढाकाका कपडा, विभिन्न जातका फलफूल र अचारका स्टल रहनेछन् ।
हिमाली जिल्लाका जडीबुटी औषधि, छुर्पी, मह, चिज, अकबरे खुर्सानीलगायत अर्गानिक कृषि उत्पादन पनि एक्स्पोमा राखिने नेपाल घरेलु तथा साना उद्योग महासंघ मोरङका अध्यक्ष चेतन निरौलाले जानकारी दिए ।
विशेष गरी महिला संलग्न भएर सुरु गरिएका लघु तथा घरेलु उद्योग, कृषिजन्य वस्तुका विशेष उत्पादनलाई एक्स्पोको माध्यमबाट बजारसम्म पु¥याउने र उनीहरूलाई पनि खुला बजारमा पहुँच स्थापित गर्ने उद्देश्यका साथ स्टलका लागि समन्वय गरिएको अध्यक्ष निरौलाले जानकारी दिए ।
‘यो एक्स्पोमा हामी पनि साझेदारका रूपमा छौँ, त्यही भएर अनेकौँ प्रकारका लघु तथा घरेलु, कृषि उद्यमको प्रवद्र्धनका लागि हामीले एक्स्पोमा विशेष स्थान पाएका छौँ,’ उनले भने, ‘हरेक उद्यमीलाई ठुला उद्योगी सरह आफ्ना उत्पादनको प्रदर्शनी र बिक्री वितरण गर्ने अवसर मिलेको छ, यो हाम्रा लागि निकै ठुलो उपलब्धि ठानेका छौँ ।’
नेपाल घरेलु तथा साना उद्योग महासंघ मोरङले एक्स्पोको सहयोगी संस्थाका रूपमा रहेर आफ्नो क्षेत्रको व्यापार व्यवसायको प्रवद्र्धनमा सक्रिय भूमिका निर्वाह गरेको छ । महासंघकै कारण जुटबाट बनेका र अन्य धेरै हस्तकलाका सामग्रीलाई ठुला व्यवसायीले जस्तै प्रदर्शन गरेर उपभोक्तासमक्ष पु¥याउन लागेको महासंघकी महिला उपसमितिकी अध्यक्ष सुनिता छाराहाङले बताइन् ।
आफ्नै लघु उद्योगबाट उत्पादित भएको क्लिनिङ साबुन, फिनेललगायत सामग्री एक्स्पोमा राख्न पाएको उद्यमी रेखा चौधरीले सुनाइन् ।
त्यसैगरी अगरबत्ती, मसलालगायत वस्तुको उत्पादन गर्दै क्रमशः उत्पादन वृद्धि गर्दै लगे पनि बजार निर्माणमा सीप र ज्ञान नभएका कारण पछि परेको अनुभव भइरहेको बेलामा एक्स्पोमा स्टल पाएर आफ्नो उत्पादन प्रदर्शन र बिक्री वितरण गर्ने अवसर हुन लागेकामा महिला उद्यमी सोमी चौलागाईंले खुसी व्यक्त गरिन् ।
सिएनआई कोसी एक्स्पो २०७९ मा ४०० भन्दा बढी स्टल रहने एक्स्पोकी सह–संयोजक गिरिजा सारडाले बताइन् । उनले महिलालाई स्टल राख्नका लागि विशेष रूपमा प्रोत्साहन गरिएको पनि जानकारी दिइन् ।
विराटनगर–२ शंकरपुरमा एक्स्पोको तयारी तीव्र पारिएको छ । एक्स्पोमा स्टल बुक गरेका उद्यमी र उद्योगी व्यवसायीका लागि आइतबारसम्म सुविधा सम्पन्न डोम हस्तान्तरण गरिने जनाइएको छ ।
