पूर्व महान्यायाधिवक्ता युवराज संग्रौलाको टिप्पणी :  रवि लामिछानेका समर्थकले नै उनलाई सिध्याउँदै छन्

पूर्व महान्यायाधिवक्ता डा. युवराज संग्रौलाले सांसद पद खारेज भएका रवि लामिछानेलाई उनकै समर्थकहरूले सिध्याउने अवस्था सृजना गरिरहेको टिप्पणी गरेका छन् । 

आइतबार फेसबुकमा पोस्ट गर्दै संग्रौलाले नागरिकताबारे व्याख्या गर्ने अन्तिम अधिकार सर्वोच्च अदालतलाई रहेको र सोहीअनुसार फैसला भए पनि तथ्यलाई बङ्ग्याएर नानाथरी बहस भइरहेको बताएका छन् । 

संग्रौलाले भनेका छन्, ‘रवि लामीछानेका बिरोधि अरु छैनन्, उनका नाममा वा समर्थनमा असभ्य गाली गर्नेको जमातले नै उनलाई समाप्त गर्दैछन् । उनले राम्रो राजनीति गरून्, देश बनाएर राजनीतिको मर्यादा राखुन यो सबैको चाहना हो । उनलाई देवता र राक्षस बनाउने दुवै प्रवृत्ति गलत हुन् ।’

पढ्नुहोस् संग्रौलाको टिप्पणी

रवि लामिछानेको नागरिकता विषयमा यथार्थ होइन, जानाजानी रोमान्टिक बहस  भैरहेको छ । अनेक खालका गोलचक्कर गफ भइरहेका छ्न । सबैले आफ्नो दुनो सोझो गरिरहेका छन् । सत्य के हो ?

१. रवि लामीछाने नेपाली नागरिक थिए, अमेरिकी पासपोर्ट लिएका रहेछ्न र अमेरिकी नागरिक भएका रहेछन् । उनी नेपाल आए । उनको राष्ट्रियता नेपाली हो । बस, नेपाली नागरिकता रहेन ।

२. नेपाली नागरिकले पुनः नेपाली नागरिक हुन पाउने ब्यवस्था छ । रवि लामिछनेलाई पुनः नेपाली नागरिक हुन पाउने अधिकार छ । यस बारेमा विवाद छैन, हुँदैन ।

३. विवाद उनी नेपाली नागरिक हुन पाउँछन् या पाउदैनन भन्ने होइन । सर्वोच्च अदालतले नागरिक हुन पाउँदैन भनेको पनि होइन । मात्र के हो भने, उनले अमेरिकी नागरिकता त्याग्ने वित्तिकै पुरानो नेपाली नागरिकता कायम हुँदैन । 

उनले आफ्नो पुरानो नागरिकता कायम गर्ने प्रक्रिया पूरा गरि नागरिकता कायम गर्नु पर्ने ब्यवस्था कानुनमा छ । सर्वोच्च अदालतले रवि लामिछाने निर्वाचनमा सरिक हुँदा यो प्रक्रिया पूरा गरेको रहेनछ भन्ने निर्णय गर्‍याे ।  त्यसको तात्पर्य हो, उनको निर्वाचन प्रक्रिया कानुनसंगत भएन । तर, उनले नागरिकता प्रक्रिया पूरा गरेर कायम गराउन नपाउने होइन ।

४. किन तथ्यलाई बङ्ग्याएर नानाथरीका बहस भइरहेका छन् । यो बहस कसका लागि निर्माण गरिएको हो ? किन निर्वाचन आयोगले समेत हिजो प्रक्रियामा सामेल हुन दियो त भन्ने जस्ता बेतुक तर्क गरिदैछन् । अझ रवि लामिछाने नागरिकताहिन ‘स्टेटलेस’ मानिस भए भन्ने वाइयात गफ निर्माण गरिदैछ । यो देशको संविधानको व्याख्या गर्ने अन्तिम आधिकारी सर्वोच्च अदालत हो । उसको निर्णय मान्नुपर्छ ।

५. देशको स्वार्थ हेरेर, राष्ट्रको पक्षमा, कानुनको पालन र नियमको कार्यन्वयन गर्ने र विग्रिएका, भत्किएका कुरालाई सम्हाल्ने हो कि राज्यलाइ भत्काएर समाप्त पार्ने हो ?

रवि लामिछानेको समर्थनका नाममा उनको सबैथोक भत्काउने जमात सक्रिय देखिदैन र सामाजिक सञ्जालमा ? उनले निवेदन दिएर नेपाली नागरिकता कायम गर्नुपर्‍याे । उनको पार्टीको अध्यक्ष फेरि उनी हुन पाउने वा नपाउने उनको दलको कुरा हो । हिजो झुठो विवरण दिएको हो वा होइन भन्ने कुरा कसैले विवाद उठाए निर्णय हुने कुरा हो । बाँकी कुरा वाइयात गफ हो । 

रवि लामिछानेका विरोधी अरू छैनन् । उनका नाममा वा समर्थनमा असभ्य गाली गर्नेको जमातले नै उनलाई समाप्त गर्दै छन् । उनले राम्रो राजनीति गरून्, देश बनाएर राजनीतिको मर्यादा राखुन । यो सबैको चाहाना हो । उनलाई देवता र राक्षस बनाउने दुवै प्रवृत्ति गलत हुन् ।