अयोध्यामा भगवान रामको मूर्ति बनाउन देव शिला जनकपुर पुग्यो

जनकपुरधाम –भारतको उत्तर प्रदेशस्थित अयोध्यामा निर्माणाधीन मन्दिरमा भगवान रामको मूर्ति बनाउन काली गण्डकी नदीको देव शिला जनकपुरधाममा आइपुगेको छ ।

हिन्दुहरूको पवित्र धार्मिक स्थल अयोध्यामा निर्माणाधीन उक्त मन्दिरमा भगवान रामको मुख्य मूर्ति बनाउन शालिग्राम शिला पाइने विश्वकै एक मात्र नदी काली गण्डकीबाट निकालेर भारत लैजानको लागि जनकपुरधाम ल्याइएको हो ।

नेपाल सरकारको मन्त्रिपरिषद् बैठकको निर्णयअनुसार १८ र १६ मेट्रिक टन तौल भएका ७ फिट लम्बाइ ५ फिट चौडाइ र तीन दशमलव पाँच फिट मोटाइका दुई शिलाको पहिचान र क्षमा पूजाको काम सम्पन्न भएपछि शिला जनकपुरधाम हुँदै अयोध्या पठाउन लागिएको हो ।

सोही शिलाबाट भगवान रामको बालस्वरुप निर्माण गरिनेछ । शिलाबाट कुदिएर निर्माण गरिने भगवान रामको बालस्वरुप राम मन्दिरको गर्भगृहमा रहने शिला सङ्कलन तथा पठाउने कार्यमा सक्रिय रहेका जानकी मन्दिरका महन्थ रामतपेश्वर दासले जानकारी दिए ।

शिलाको मधेश प्रदेशका प्रदेश प्रमुख हरिशंकर मिश्र, मुख्यमन्त्री सरोजकुमार यादव, सभामुख रामचन्द्र मण्डल, एमाले नेतृ तथा संघीय सांसद जुली महतोलगायतले पूजा अर्चना गरेका हुन् । दर्शनको लागि जानकी मन्दिर प्राङ्गणमा भक्तजनको भीड लागेको छ । 

‘राम मन्दिरमा स्थापित हुने मूल स्वरूप नै नेपालको शिलाबाट तयार गरिनेछ’ उनले भने, २ वटा शिलाबाट एकै साथ मूर्ति बनाइनेछ । राम मन्दिरमा ४ सय वटा कलात्मक पिल्लर राखिएको छ । हरेक खम्बामा १६ वटा देवीदेउताका मूर्ति कुदिनेछ । मन्दिर न्यास समितिले सार्वजनिक गरेको विवरण अनुसार मन्दिरको ४० सय खम्बामा गरी ६ हजार ४०० देवीदेउताका कलात्मक मूर्तिहरू कुदिनेछ ।

जनकपुरधाममा ल्याइएको सोही देव शिलाको आइतबार जनकपुरधामस्थित जानकी मन्दिरमा दर्शन, पूजन एवं महाआरती गरी अयोध्या पठाइने छ । 

गत बुधबार देव शिला काली गण्डकीबाट निकालेर गलेश्वरधाम परिसरमा लगिएको थियो । मन्दिरमा रुद्राभिशेकसहित विशेष पूजा गरी जनकपुरधाम हुँदै अयोध्याको लागि बिदाइ गरिएको थियो । म्याग्दीको बेनी ६ ठुलोपहिरोस्थित काली गण्डकी नदी किनारको शिला बुधबार क्रेनमार्फत निकाली गाडीमा राखेर गलेश्वर लगिएको थियो ।