काठमाडौँ –राष्ट्रिय स्वतन्त्र पार्टीले गृह मन्त्रालयमा आफ्नो दाबी यथावत् रहने दाबी गरेको छ । नागरिकता विवादमा मुछिएपछि अध्यक्ष रावि लामिछानेले गृहमन्त्रीबाट राजीनामा दिएका थिए । लामिछानेले आइतबार पुनः नेपाली नागरिकता प्राप्त गरेका छन् ।
पार्टी प्रवक्ता मुकुल ढकालले गृह मन्त्रालयमा आफ्नो दाबी यथावत रहेको बताए । गृह मन्त्रालयमा दावी रहेपनि कसलाई पठाउने भन्ने विषयमा छलफल नभएको ढकालको भनाइ छ ।
यसैबीच पार्टीको केन्द्रीय समिति बैठक बोलाइएको छ । समसामयिक विषयमा धारणा बनाउन केन्द्रीय समिति बैठक आइतबार साँझ बस्न लागेको हो । बैठकबाट लामिछानेलाई पार्टी सभापति बनाउने तयारी छ । उनको नागरिकता प्राप्त भएकाले सभापति बनाइने केन्द्रीय समितिको तयारी छ ।
शुक्रबार सर्वोच्च अदालतले लामिछानेको नागरिकता अवैध भएको ठहर गरेको थियो । सर्वोच्चको आदेशपछि लामिछानेको सांसद र मन्त्री पद दुवै गुमेको थियो । लामिछाने गत ११ पुसमा उपप्रधान तथा गृहमन्त्रीमा नियुक्त भएका थिए । नागरिकता विवादमा आएपछि उपप्रधान एवं गृहमन्त्री लामिछानेले पदबाट राजीनामा दिएका थिए ।
