लुम्बिनी मागी खाने भाँडो होइन : मन्त्री किराँती

काठमाडौँ– संस्कृति, पर्यटन तथा नागरिक उड्डयन मन्त्री सूदन किराँतीले लुम्बिनी विकासका कर्मचारीलाई क्यालेन्डरअनुसार कार्ययोजना बनाएर काम गर्न निर्देशन दिएका छन् । 

आइतबार लुम्बिनी विकास कोषले आयोजना गरेको संस्कृति, पर्यटन तथा नागरिक उड्डयन मन्त्री र राज्यमन्त्रीलाई स्वागत कार्यक्रममा बोल्दै मन्त्री किराँतीले लुम्बिनी विकास कोषले देखाएको कार्यप्रगतिको रिपोर्ट सन्तोषजनक नभएको भन्दै कोषका कर्मचारीलाई क्यालेन्डरअनुसार कार्ययोजना बनाएर काम गर्ने निर्देशन दिएका हुन् । 

उनले लुम्बिनी जस्तो पवित्र स्थलको काम इमानसाथ गर्न आग्रह गरे । मन्त्री किराँतीले लुम्बिनीको विकास गर्न कोषसँग बजेट, कार्यक्रम हुँदाहुँदै काम नभएको भन्दै अब भने योजनाअनुसारको काम चाहिने बताए । 

नेपालको कानुनअनुसार संरचनाहरू निर्माण भएको भन्दै संरचनाहरूमा कर्मचारी भएर पनि काम किन नभएको रु भन्दै प्रश्न गरे ।

उनले लुम्बिनी विकासको बाँकी काम गर्न क्यालेन्डरअनुसार ७ दिन, १ महिना, ३ महिना, ६ महिना र १ वर्षमा के गर्ने भन्ने कार्ययोजना बनाउन निर्देशन दिए । गौतम बुद्धको जन्मथलो लुम्बिनी मागी खाने भाँडो नभएर बौद्ध धर्मावलम्वीहरूको नाभी तथा ढुकढुकी भएको उनको भनाइ छ । 

मन्त्री किराँतीले कर्मचारीहरूलाई पवित्र थलोमा बसेर अपवित्र कर्म नगर्न आग्रह गरे । नेपालले गौरवका साथ विश्वमा गौतम बुद्धको नाम बेच्ने, पवित्र थलो लुम्बिनी भन्ने तर लुम्बिनीमा नै अपवित्र काम गर्न कसैलाई छुट नभएको उनको भनाइ थियो ।

उनले लुम्बिनी विकास कोषको काम भएन भनेर कर्मचारी सरुवा गरेर रमिता नदेखाउने बताए । कर्मचारी सरुवा तथा थर्काउने पुरानो प्रवृत्ति भएको भन्दै वर्तमान सरकार कर्मचारीहरूबाट क्यालेन्डरअनुसार कामको परिणाम ल्याउने उनले सुनाए । 

मन्त्री किराँतीले कर्मचारीहरूले जस्केला वा झ्यालबाट छिरेर काम गर्ने कोसिस नगर्न समेत आग्रह गरे । उनले आफू देशको हितविपरीत हुने कुनै पनि क्रियाकलापसँग सम्झौता नगर्ने दाबी गरे ।

कार्यक्रममा पर्यटन सचिव सुरेश अधिकारीले लुम्बिनी विकास गुरुयोजनाभन्दा बाहिर संरचना निर्माण भएको स्वीकार गरे । उनले गुरुयोजनाभन्दा बाहिरका संरचना बनाउनुपर्ने बाध्यता भए पनि कतिपय बनाउनु नपर्ने संरचना बनाइएको बताए । 

लुम्बिनी विकासको गुरुयोजना निर्माणमा ढिलाइ भइरहेको बताउँदै अधिकारीले बजेटको कमी, बजेट समयमा नै निकासा नहुने मात्रै नभई कोषको काम प्राथमिकतामा भर पर्ने बताए ।

उनले लुम्बिनी क्षेत्रभित्रका विभिन्न जग्गा अन्तर्राष्ट्रिय धार्मिक संस्थाहरूलाई बाँडफाँट भएकाले समस्या भएको पनि बताए ।