काठमाडौँ –सत्तारुढ नेकपा (माओवादी केन्द्र)ले गृहमन्त्री कसलाई बनाउने भन्ने विषयको टुंगो लगाउने जिम्मेवारी प्रधानमन्त्री तथा पार्टी अध्यक्ष पुष्पकमल दाहाल प्रचण्डलाई दिएको छ ।
सोमबार पार्टी पदाधिकारीको बैठकले गृहमन्त्रीको विषयमा टुंगो लगाउने जिम्मा अध्यक्षलाई दिएको हो ।
पदाधिकारी बैठकमा अधिकांसले गृहमन्त्री आफ्नै पार्टीका हुनुपर्नेमा बताएका थिए ।
उपाध्यक्ष कृष्णबहादुर महराका अनुसार प्रधानमन्त्री प्रचण्डले निर्णय गर्ने विषय भएकाले त्यसलाई पार्टी भित्र प्रवेश नै नगराइएको हो । उनले भने, ‘गृहमन्त्रीको विषयमा प्रवेश नै गरिएन । यो सरकारको विषय हो । गृहमन्त्री को हुन्छ, को हुन्न? भन्ने कुरा उहाँले टुंगो लगाउने कुरा हो । यो पार्टीले टुंग्याउने कुरा होइन । स्थायी कमिटीमा त्यो विषयमा पर्सी छलफल होला ।’
सर्वोच्च अदालतले आदेश दिएपछि गत शुक्रबार उपप्रधानमन्त्री तथा गृहमन्त्री रवि लामिछानेले आफनो पद गुमाएका थिए । सोही पदमा कसलाई बनाउने भन्ने विषयमा प्रधानमन्त्री प्रचण्डले आवश्यक निर्णय गरेका छैन भने लामिछाने नेतृत्वको राष्ट्रिय स्वतन्त्र पार्टीले आफ्नो जिम्मेवारीमा रहेको भन्दै सो मन्त्रालयमा दाबी नछाडने जनाएको छ ।
