काठमाडौँ –राष्ट्रिय स्वतन्त्र पार्टी (रास्वपा) का नेता अरनिको पाण्डेले आफ्नो पार्टीले गृह मन्त्रालय नछाड्ने स्पष्ट पारेका छन् ।

सत्ता गठबन्धनको भागबन्डामा आफ्नो पार्टीको भागमा गृह मन्त्रालय परेको हुँदा छाड्न नसकिने उनको भनाइ छ ।

पाण्डेले सामाजिक सञ्जाल ट्विटरमा गृह मन्त्रालय पाउने आफ्नो अधिकार भएको दाबी गरेका छन् । र, त्यो अधिकार (गृह मन्त्रालय रास्वपाले पाउने) फिर्ता लिन आफूहरू जुट्नुपर्ने उनको भनाइ छ ।

‘गृह मन्त्रालय रास्वपालाई फिर्ता आउनुपर्छ ? पक्का ! यो अधिकार फिर्ता लिन हामी जुट्नैपर्छ,’ पाण्डेले लेखेका छन् ।

तर, उनले गृह मन्त्री कसलाई बनाउने भन्ने विषयमा भने फरक धारणा सार्वजनिक गरेका छन् । उनले रास्वपाको तर्फबाट सबैभन्दा सक्षम, विवादरहित अनि पार्टी र देशको गौरव बढाउने व्यक्तिलाई गृह मन्त्री बनाउनुपर्ने आशय व्यक्त गरेका छन् ।

‘अहिलेको परिस्थितिमा रास्वपाको टिमबाट सबैभन्दा सक्षम, विवादरहित, अनि  पार्टी र देशको गौरव बढाउने गृह मन्त्री को हुन सक्ला ? यो छुट्टै प्रश्न हो,’ पाण्डेले लेखेका छन् ।

रास्वपा सभापति तथा संसदीय दलका नेता रवि लामिछानेको नागरिकता विवादमा सर्वाेच्च अदालतले उनको नागरिकता कानुनअनुसार कायम नरहेको आदेश गरेको थियो ।

सर्वाेच्चको सोही आदेशअनुसार लामिछाने गृहमन्त्री, सांसद र उनको पार्टीको सभापति पदबाट पदमुक्त भइसकेका छन् ।

उनले फेरि प्रक्रिया पूरा गरेर नागरिकता पुनर्प्राप्ति गरेपछि पार्टी सभापति बनिसकेका छन् भने गृह मन्त्री कसलाई बनाउने भन्ने विवाद कायमै छ । सोही विवादका कारण पाण्डेको यस्तो धारणा आएको हो ।